தொடர் வெற்றி நாயகனின் அடுத்த படத்தில் யுவன்ஷங்கர் ராஜா!
- IndiaGlitz, [Saturday,August 31 2019]
இசையமைப்பாளர் யுவன்சங்கர் ராஜா இன்று தனது பிறந்தநாளை கொண்டாடி வரும் நிலையில் கோலிவுட் திரையுலகிலகினர் அவருக்கு பிறந்தநாள் வாழ்த்துக்களை குவித்து வருகின்றனர். இந்த நிலையில் தொடர் வெற்றி பெற்ற நாயகனான ஜெயம் ரவியின் அடுத்த படத்தில் யுவன்சங்கர் ராஜா இசையமைக்க உள்ளதாக செய்திகள் வந்துள்ளது.
'டிக் டிக் டிக்' 'அடங்கமறு', 'கோமாளி' என ஹாட்ரிக் தொடர் வெற்றி பெற்ற ஜெயம்ரவி நடித்து வரும் அடுத்த படம் 'ஜன கன மன'. இந்த படத்தில் ஜெயம் ரவியுடன் டாப்ஸி உள்பட பலர் நடித்து வரும் நிலையில் இந்த படத்தின் படப்பிடிப்பு தற்போது அஜர்பைஜான் நாட்டில் நடந்து வருகிறது.
இந்த நிலையில் இந்த படத்திற்கு இசைப்புயல் ஏஆர் ரகுமான் இசையமைக்க வாய்ப்பு இருப்பதாக கடந்த இரண்டு நாட்களுக்கு முன் செய்திகள் வெளிவந்தன. ஆனால் தற்போது வந்துள்ள புதிய தகவலின்படி இந்த படத்திற்கு யுவன் சங்கர் ராஜா இசையமைக்க உள்ளதாக கூறப்படுகிறது. இதுகுறித்த அறிவிப்பை படக்குழுவினர் விரைவில் வெளியிடுவார்கள் என்று தெரிகிறது.
'என்றென்றும் காதல்' இயக்குனர் அகமது இயக்கி வரும் இந்த படத்தில் ஈரான் நாட்டின் நடிகை ல்னாஸ் நோரோஸி மற்றும் 'செக்க சிவந்த வானம்' படத்தில் சிம்பு ஜோடியாக நடித்த டயானா எரப்பா ஆகியோர் முக்கிய கேரக்டர்களில் நடிக்கின்றனர் என்பது குறிப்பிடத்தக்கது.