யுவன்ஷங்கர் ராஜா-கார்த்திக் ராஜா இணைந்த தமிழ்ப்படம்
- IndiaGlitz, [Wednesday,April 05 2017]
இசைஞானி இளையராஜாவின் இசை வாரீசுகளாக அவரது மகன்கள் கார்த்திக் ராஜா மற்றும் யுவன்ஷங்கர் ராஜா ஆகியோர் இருந்தபோதிலும் யுவன்ஷங்கர் ராஜா தற்போது முன்னணி இசையமைப்பாளர்களின் பட்டியலில் உள்ளார். அதுமட்டுமின்றி திரைப்பட தயாரிப்பு நிறுவனம் ஒன்றை தொடங்கி அதன் மூலம் லேடி சூப்பர் ஸ்டார் நயன்தாரா நடித்து வரும் 'கொலையுதிர்க்காலம்' என்ற படத்தையும் தயாரித்து வருகிறார்.
இந்நிலையில் யுவன்ஷங்கர் ராஜா இசை நிறுவனம் ஒன்றையும் தொடங்கி ஒருசில படங்களின் இசை உரிமையை பெற்று வருகிறார். பாரதிராஜா நடித்து வரும் 'குரங்கு பொம்மை' படத்தின் இசையுரிமையை நேற்று யுவனின் இசை நிறுவனம் பெற்றது என்ற செய்தி வெளிவந்த நிலையில் இன்று, பாரதிராஜா நடித்து வரும் இன்னொரு படமான 'படைவீரன் என்ற படத்தின் இசையுரிமையையும் பெற்றுள்ளதாக செய்தி வெளிவந்துள்ளது. 'படைவீரன்' படத்திற்கு யுவனின் சகோதரர் கார்த்திக்ராஜா இசையமைத்துள்ளார் என்பதும் இசைஞானியின் இரு வாரீசுகள் இணைந்த படம் என்ற பெருமையை 'படைவீரன்' பெற்றுள்ளது என்பதும் குறிப்பிடத்தக்கது.
பிரபல பின்னணி பாடகர் விஜய் ஜேசுதாஸ், பாரதிராஜா, அகில், அமிர்தா, மனோஜ்குமார் உள்ளிட்ட பலர் நடித்துள்ள இந்த படத்தை தானா என்பவர் இயக்கியுள்ளார்.இந்த படம் விரைவில் வெளியாகவுள்ளது.