టీడీపీకి టాటా చెప్పి బీజేపీ తీర్థం పుచ్చుకున్న ఎంపీ సుజనా చౌదరిపై వైసీపీ ఎంపీ బాలశౌరి సంచలన వ్యాఖ్యలు చేశారు. బీజేపీ తీర్థం పుచ్చుకున్న తర్వాత సుజనా స్పీడ్ పెంచి మరీ జగన్‌ సర్కార్‌పై తీవ్ర స్థాయిలో విమర్శలు గుప్పిస్తున్నారు. ఇటీవల ఏపీలో పర్యటిస్తున్న ఆయన.. కేంద్ర హోంమంత్రి అమిత్ షా- సీఎం వైఎస్ జగన్‌‌పై మాట్లాడుతూ నోరుపారేసుకున్నారు. అయితే ఈ వ్యవహారంపై తాజాగా.. వైసీపీ ఎంపీ మాట్లాడుతూ స్ట్రాంగ్ కౌంటరిచ్చారు. సుజనా డూప్లికేట్‌ బీజేపీ నేత, పొలిటికల్‌ బ్రోకర్ అని ఆయన మాటలకు విలువలేదన్నారు. ఈ సందర్భంగా బీజేపీ ఎంపీపై సూటి ప్రశ్నల వర్షం కురిపించారాయన.

రాష్ట్ర ప్రయోజనాలా.. చంద్రబాబు ప్రయోజనాలా!?

‘సుజనా బీజేపీలో చేరింది చంద్రబాబు అజెండా మోయడానికి కాదా..?. మీకు రాష్ట్ర ప్రయోజనాలు ముఖ్యమా..? చంద్రబాబు ప్రయోజనాలు ముఖ్యమా..?. ప్రధానమంత్రి నరేంద్రమోడీకి వ్యతిరేకంగా ధర్మదీక్షలు చేసింది నువ్వు కాదా..?. కేంద్ర హోంమంత్రి అమిత్‌ షా – జగన్‌మోహన్‌రెడ్డి భేటీ గురించి నిజమైన బీజేపీ నేత జీవీఎల్‌ నర్సింహారావు వివరించారు. సుజనా డూప్లికేట్‌ బీజేపీ నేత కాబట్టే చంద్రబాబు అజెండా అమలు చేస్తున్నారు. సుజనా చౌదరిపై ఎథిక్స్‌ కమిటీకి ఫిర్యాదు చేస్తాను. ఇప్పటికే జీవీఎల్‌ కూడా సుజనాపై ఫిర్యాదు చేశారరు. బ్యాంకులను మోసం చేసి డబ్బులు ఎగ్గొట్టిన సుజనా లాంటి వాళ్లు చట్టసభల్లోకి రాకుండా పార్లమెంట్‌లో ప్రైవేట్‌ బిల్లు పెడతాం’ అని బాలశౌరి చెప్పుకొచ్చారు. మొత్తానికి చూస్తే సుజనా వ్యాఖ్యలను సీరియస్ తీసుకున్న వైసీపీ.. ప్రధాని మొదలుకుని పార్లమెంట్ దాకా ఈ వ్యవహారాన్ని లాగాలని చూస్తోందని స్పష్టంగా అర్థం చేసుకోవచ్చు. మరి సుజనా చౌదరి ఎలా రియాక్ట్ అవుతారో వేచి చూడాల్సిందే.