டிக்டாக்கில் வீடியோ பதிவு செய்து அதிக லைக்ஸ்களை பெறுவதற்காக பலர் ரிஸ்க் எடுத்து வருவதால் பெரும் விபரீதங்களும் அவ்வப்போது ஏற்பட்டு வருகிறது என்பதை பார்த்து வருகிறோம். அந்த வகையில் கிருஷ்ணகிரி மாவட்டத்தைச் சேர்ந்த வாலிபர் ஒருவர் டிக்டாக்கில் வீடியோ எடுப்பதற்காக மீனை விழுங்கியதால் மரணமடைந்த சம்பவம் பெரும் அதிர்ச்சியை ஏற்படுத்தியுள்ளது

கிருஷ்ணகிரி மாவட்டத்தில் உள்ள வெற்றிவேல் என்ற 22 வயது வாலிபருக்கு திருமணமாகி இரண்டு வயதில் ஒரு மகன் உள்ளார். கட்டிட மேஸ்திரியாக வேலை பார்த்து வரும் இவர் நேற்று தனது நண்பர்களுடன் மீன் பிடிக்கச் சென்றார். அப்போது அவர் போதையில் இருந்ததாகவும் கூறப்படுகிறது

இந்த நிலையில் மீனைப் பிடித்து அதை விழுங்குவது போன்று வீடியோ எடுத்து அதை அப்படியே டிக்டாக்கில் பதிவு செய்ய முடிவு செய்தார். இதனையடுத்து அவர் மீனை விழுங்குவது போல் வீடியோ எடுத்து கொண்டிருந்தபோது எதிர்பாராதவிதமாக, மீன் வாய்க்குள் சென்று விட்டது. அவர் விழுங்கிய மீன் சுவாசக்குழாயில் அடைத்து கொண்டதால் அவருக்கு மூச்சு திணறல் ஏற்பட்டது.

இதனையடுத்து உடனடியாக அவரை நண்பர்கள் மருத்துவமனையில் சேர்த்தனர். ஆனால் அவர் ஏற்கனவே இறந்துவிட்டதாக மருத்துவர் கூறியதால் அனைவரும் அதிர்ச்சி அடைந்துள்ளனர். இது குறித்து காவல்துறையினர் வழக்குப் பதிவு செய்து விசாரணை செய்து வருகின்றனர். டிக்டாக் வீடியோவுக்காக ரிஸ்க் எடுத்து மீனை விளங்கிய வாலிபர் ஒருவர் பரிதாபமாக மரணம் அடைந்ததால், அவருடைய மனைவியும் இரண்டு வயது மகனும் தற்போது திக்கற்ற நிலையில் இருப்பது அந்த பகுதியில் உள்ளவர்களை பெரும் சோகத்திற்கு உள்ளாக்கியுள்ளது