பட்டப்பகலில் நடுரோட்டில் காதலியை அரிவாளால் வெட்டிய காதலன்: வீடியோ எடுத்த பொதுமக்கள்!
- IndiaGlitz, [Tuesday,December 22 2020]
பட்டப்பகலில் நடுரோட்டில் வாலிபர் ஒருவர் தனது காதலியை அரிவாளால் சரமாரியாக வெட்டிக் கொண்டிருந்த நிலையில் சுற்றி நின்ற பொதுமக்கள் வேடிக்கை பார்த்ததோடு தங்கள் செல்போனில் வீடியோ எடுத்தது பெரும் பரபரப்பை ஏற்படுத்தி உள்ளது
கர்நாடக மாநிலம் உடுப்பி என்ற பகுதியைச் சேர்ந்த இஸ்மாயில் என்பவர் ஆஷா என்ற பெண்ணை கடந்த இரண்டு ஆண்டுகளாக காதலித்து வந்துள்ளார். இந்த நிலையில் திடீரென இஸ்மாயில் நடவடிக்கைகளுக்கு பிடிக்காமல் போகவே இஸ்மாயிலிடம் இருந்து ஆஷா விலகியதாக தெரிகிறது
இதனால் குழப்பத்தில் தவித்த இஸ்மாயில் நேற்று ஒரு முடிவுடன் தனது காதலியை சந்திக்க முடிவு செய்தார். காதலியை நேரில் சந்தித்து தனது காதலை ஏன் தவிர்க்கின்றாய் என்றும் தனது காதலை தொடருமாறும் வற்புறுத்தினார். ஆனால் பிடிவாதமாக இஸ்மாயிலிடம் இருந்து பிரிந்து செல்வதில் ஆஷா உறுதியாக இருந்தார்
இதனால் ஆத்திரமடைந்த இஸ்மாயில் தான் மறைத்து வைத்திருந்த அரிவாளை எடுத்து நடுரோட்டில் ஆஷாவை சரமாரியாக வெட்டினார். ஆஷாவின் கழுத்து முகம் கை கால்கள் போன்ற பகுதிகளில் வெட்டு விழுந்ததால் அவர் ரத்த வெள்ளத்தில் நடுரோட்டில் உயிருக்கு போராடினார். இந்த சம்பவம் பட்டப்பகலில் நடுரோட்டில் நடந்து கொண்டிருந்த நிலையில் சுற்றி நின்றிருந்த பொதுமக்கள் யாரும் இஸ்மாயிலை தடுக்கவில்லை. அதுமட்டுமின்றி ஒரு சிலர் செல்போனில் அரிவாளால் வெட்டுவதை வீடியோ எடுத்துக்கொண்டிருந்தனர்
இந்த நிலையில் ஒருவர் மட்டும் தைரியத்துடன் வந்து இஸ்மாயிலை பிடித்து காவல் துறைக்கு தகவல் தெரிவித்தார். காவல்துறையினர் விரைந்து சம்பவ இடத்திற்கு வந்து இஸ்மாயிலை கைது செய்து விசாரணை நடத்தி வருகின்றனர். இந்த நிலையில் ரத்த வெள்ளத்தில் உயிருக்கு போராடிக் கொண்டிருந்த ஆஷா தற்போது மருத்துவமனையில் அனுமதிக்கப்பட்டு சிகிச்சை பெற்று வருகிறார் என்பது குறிப்பிடத்தக்கது
பட்டப்பகலில் இளம்பெண் ஒருவரை வாலிபர் ஒருவர் சரமாரியாக வெட்டிய சம்பவம், அந்த சம்பவத்தை தடுக்காமல் பொதுமக்கள் வீடியோ எடுத்துக் கொண்டு இருந்ததும் பெரும் பரபரப்பை ஏற்படுத்தி உள்ளது