கடந்த சில மாதங்களாகவே தொலைக்காட்சி நடிகர், நடிகைகளின் தற்கொலைகள் அதிகரித்து வருவதாக கூறப்படும் நிலையில் இன்று ஒரு பிரபல டிவி சீரியல் நடிகை தூக்கில் தொங்கி தற்கொலை செய்துள்ளார்.

இந்தி, வங்காளம் உள்பட பல மொழி டிவி தொடர்களில் நடித்து வருபவர் மெளமிதா சஹா. இவர் மேற்குவங்க மாநில தலைநகர் கொல்கத்தாவில் அடுக்குமாடி குடியிருப்பில் தனியாக வசித்து வந்தார். கடந்த சில நாட்களாக இவர் மன அழுத்தத்தில் இருந்ததாக கூறப்பட்ட நிலையில் திடீரென அவரது வீட்டில் தூக்கில் தொங்கி தற்கொலை செய்து கொண்டார்.

மெளமிதா சஹா தூக்கில் தொங்குவதை ஜன்னல் வழியாக பார்த்த பக்கத்து வீட்டினர் உடனடியாக கொல்கத்தா போலீசாருக்கு தகவல் அளித்தனர். போலீசார் விரைந்து வந்து மெளமிதா சஹாவின் உடலை கைப்பற்றி பிரேத பரிசோதனைக்கு அனுப்பி வைத்தனர். மெளமிதா சஹாவின் படுக்கை அறையில் ஒரு கடிதமும் செல்போனும் இருந்ததாகவும், அதை போலீசார் கைப்பற்றியுள்ளதாகவும் தெரிகிறது. அந்த கடிதத்திலும் செல்போனிலும் அவரது தற்கொலைக்கான காரணம் இருக்கும் என்று கூறப்படுகிறது