ఆర్ఆర్ఆర్ రిలీజ్ : తండ్రి మందలించాడని .. ఉరేసుకుని అభిమాని ఆత్మహత్య
- IndiaGlitz, [Saturday,March 26 2022]
తెలుగు రాష్ట్రాలతో పాటు ఇప్పుడు ఇండియాలో ఎక్కడ చూసినా ‘‘ఆర్ఆర్ఆర్’’ మ్యానియానే నడుస్తోంది. ఏ ఒక్కరిని కదిలించినా ఈ సినిమా గురించే మాట్లాడుకుంటున్నారు. సామాన్యులతో పాటు పలువురు ప్రముఖులు కూడా సినిమాను తొలిరోజే చూసి.. హీరోలు రామ్‌చరణ్, ఎన్టీఆర్, దర్శకుడు రాజమౌళిపై ప్రశంసలు కురిపిస్తున్నారు. అయితే సినిమా రిలీజ్ సందర్భంగా పలు చోట్ల అపశృతులు చోటు చేసుకున్నాయి. మెగా నందమూరి అభిమానుల మధ్య గొడవలు జరగ్గా.. అనంతలో ఇద్దరు అభిమానులు మృతిచెందడం విషాదం నింపింది.
అనంతపురం జిల్లా కళ్యాణదుర్గంలో శంకర్ అనే యువకుడు కాలేజీకి వెళ్లకుండా ఆర్ఆర్ఆర్ సినిమాకు వెళ్లాడు. సినిమా చూసి ఇంటికి వచ్చిన యువకుడిని తండ్రి మందలించాడు. దీంతో మనస్థాపానికి గురైన శంకర్ ఉరివేసుకుని ఆత్మహత్య చేసుకున్నాడు. సమాచారం అందుకున్న పోలీసులు ఘటనా స్థలానికి చేరుకుని వివరాలు సేకరిస్తున్నారు.
అనంతపురం జిల్లాలోనే జరిగిన మరో ఘటనలో ఆర్ఆర్ఆర్ సినిమా చూస్తూ గుండెపోటుతో ఓ అభిమాని మృతి చెందాడు. శుక్రవారం ఎస్ వీ మ్యాక్స్ థియేటర్లో ఆర్ఆర్ఆర్ సినిమా బెనిఫిట్ షోలు వేయడంతో ఓబులేసు (30) అనే వ్యక్తి తన స్నేహితులతో కలిసి ప్రీమియర్ షోకి వెళ్లాడు. సినిమా చూస్తున్న సమయంలో ఒక్కసారిగా అతడికి గుండెపోటు వచ్చింది. దీంతో వెంటనే అప్రమత్తమైన తోటి అభిమానులు అతనిని ట్రీట్మెంట్ కోసం హాస్పిటల్ కి తరలించారు. అయితే మార్గమధ్యంలోనే అతడు మృతి చెందినట్లు వైద్యులు ధ్రువీకరించారు. దీంతో ఓబులేసు కుటుంబసభ్యులు, సన్నిహితులు విషాదంలో కూరుకుపోయారు.