ఉదయ్ కిరణ్.... ఎంత త్వరగా స్టార్ హీరోగా ఉదయించాడో.. అంతే త్వరగా డీలా పడిపోయాడు. చిత్రం సినిమాతో ఎంట్రీ ఇచ్చి నువ్వు నేను, మనసంతా నువ్వే సినిమాలతో హ్యాట్రిక్ కొట్టిన ఉదయ్ కిరణ్ .. నీ స్నేహం, శ్రీ రామ్ వంటి సినిమాలతో తనకు ఎదురులేదు అనిపించుకున్నాడు ఆ టైంలో. సూపర్ స్టార్ కమల్ హాసన్ తర్వాత అతి చిన్నవయస్సులో నంది అవార్డు అందుకున్న ఘనత ఉదయ్ కిరణ్ సొంతం. ఏకంగా మెగాస్టార్ చిరంజీవి అతన్ని అల్లుడిగా చేసుకుంటానని ముచ్చటపడ్డాడు. కానీ కొన్ని కారణాల వల్ల అది సాధ్యం కాలేకపోయింది. ఆ తర్వాత అతని కెరియర్ అంధకారమై పోయింది. అవకాశాలు రాక... వచ్చిన అవకాశాలు నిలబెట్టుకోలేక పదేళ్లపాటు నరకం అనుభవించాడు. తన జీవితం అలా అయిపోవడంతో మనస్తాపం చెంది.... ఇంట్లోనే ఉరేసుకుని ఆత్మహత్య చేసుకున్నాడు.

అయితే ఇండస్ట్రీలో బయోపిక్ ల హవా నడుస్తున్న వేళ... ఉదయ్ కిరణ్ బయోపిక్ ను తెరకెక్కించేందుకు సన్నాహాలు జరుగుతున్నాయి. యంగ్ హీరో సందీప్ కిషన్ ఉదయ్ కిరణ్ పాత్ర చేయనుండగా... షార్ట్ ఫిల్మ్ చేసిన ఓ దర్శకుడు సినిమాను తెరకెక్కించనున్నాడు. అయితే ఓ వ్యక్తి కారణంగానే ఉదయ్ కిరణ్ జీవితం అర్ధాంతరంగా ముగిసిందని అప్పట్లో టాక్. మరి అది నిజమేనా..? నిజమైతే యంగ్ డైరెక్టర్ ఆ వ్యక్తిని ఎదురించి ఉదయ్ కిరణ్ నిజ జీవితాన్నే తెరకెక్కిస్తాడా చూడాలి మరి.