మెగాస్టార్ చిరంజీవి తొలి చిత్ర దర్శకుడు రాజ్ కుమార్ తుదిశ్వాస విడిచిన సంగతి తెలిసిందే. అయితే ఈ విషాద ఘటన మరువకే ముందే టాలీవుడ్‌ మరో ఘటన చోటుచేసుకుంది. ‘పరారే పరరె’, ‘ఫ్రెండ్స్ బుక్’తో పాటు పలు తమిళ సినిమాల్లో హీరోగా నటించిన తూర్పుగోదావరి జిల్లా కాకినాడకు చెందిన నందురీ ఉదయ్ కిరణ్ (34) ఇవాళ కన్నుమూశాడు. శుక్రవారం రాత్రి 10:30 గంటలకు ఆయనకు గుండెపోటు రాగా కుటుంబ సభ్యులు హుటాహుటిన కాకినాడ ప్రభుత్వాస్పత్రికి తరలించారు. చికిత్స పొందుతూనే ఉదయ్ కన్నుమూశాడు. దీంతో కిరణ్ కుటుంబ సభ్యులు కన్నీరుమున్నీరవుతున్నారు. కాగా.. ఆస్పత్రి నుంచి భౌతికకాయాన్ని రామారావుపేటలోని తన స్వగ్రామానికి తరలించారు. ఇవాళ సాయంత్రం లేదా రేపు మధ్యాహ్నం అంత్యక్రియలు జరగనున్నాయని తెలుస్తోంది.

టాలీవుడ్‌కు చెందిన పలువురు ప్రముఖులు, నటీనటులు, రాజకీయ నేతలు ఆయన మృతిపట్ల సంతాపం తెలిపి.. కుటుంబ సభ్యులకు ప్రగాఢ సానుభూతి ప్రకటించారు. ఇదిలా ఉంటే.. ఓవైపు తమిళ సినిమాల్లో.. మరోవైపు తెలుగు సినిమాల్లోనూ ఇప్పుడిప్పుడే తనకంటూ ప్రత్యేక గుర్తింపు సంపాదించుకుంటున్న ఉదయ్ కిరణ్ ఇలా అర్ధాంతరంగా చనిపోవడంతో కుటుంబ సభ్యులు, మిత్రులు, ఆప్తులు విషాదంలో మునిగిపోయారు.