ஹீரோக்களாக மாறும் யோகிபாபு-ரமேஷ் திலக்
- IndiaGlitz, [Tuesday,October 31 2017]
கோலிவுட் திரையுலகில் காமெடி நடிகர்கள் ஹீரோவாக மாறுவது புதியதல்ல. நாகேஷ், கவுண்டமணியில் இருந்து விவேக், வடிவேலு, சந்தானம் வரை பல காமெடி நடிகர்கள் ஹீரோக்களாக புரமோஷன் ஆகியுள்ளனர். அந்த வகையில் தற்போது பல திரைப்படங்களில் காமெடியில் கலக்கி வரும் யோகிபாபு, ரமேஷ்திலக் ஆகியோர் ஒரு படத்தில் முக்கிய வேடங்களில் நடிக்கவுள்ளனர்.
'சத்திய சோதனை' என்ற தலைப்பில் உருவாகவுள்ள இந்த படம் சென்னையை பற்றிய ஒரு நையாண்டி படம் என்று கூறப்படுகிறது. இந்த படத்தை நட்டுதேவ் என்பவர் இயக்கவுள்ளார். இவர் 'காக்கா முட்டை' இயக்குனர் மணிகண்டனிடம் உதவி இயக்குனராக பணியாற்றியவர் என்பது குறிப்பிடத்தக்கது.
இந்த படத்தை சமீர் பரத்ராம் என்பவர் தயாரிக்கவுள்ளார். இந்த படத்தில் நடிக்கும் மற்ற நடிகர், நடிகையர், தொழில்நுட்ப கலைஞர்கள் தேர்வு நடைபெற்று வருவதாகவும், இந்த படத்தின் படப்பிடிப்பு விரைவில் சென்னையில் தொடங்கும் என்றும் தயாரிப்பாளர் சமீர் தெரிவித்துள்ளார்.