మాజీ సీఎం నాదెండ్ల భాస్కరరావు గత కొద్దిరోజులుగా యూట్యూబ్‌‌లో ఓ రేంజ్‌లో హల్ చల్ చేస్తున్నారు. యూట్యూబ్ ఓపెన్ చేస్తే చాలు దాదాపు ట్రెండింగ్‌ వీడియోలన్నీ నాదెండ్లవే. ఒక్కమాటలో చెప్పాలంటే అతి తక్కువ టైమ్‌లోనే నాదెండ్ల యూ ట్యూబ్ స్టార్ అయిపోయారు. ఇంత వరకూ ఎవరూ ఎరుగని హాట్ హాట్ కామెంట్స్ చేస్తూ.. సమాజానికి తెలియని కొన్ని సంచలన విషయాలు ఆయన బయటపెడుతున్నారు. మరీ ముఖ్యంగా దివంగత ముఖ్యమంత్రి ఎన్టీఆర్, ప్రస్తుత సీఎం చంద్రబాబు గురించి నాదెండ్ల చేసిన సంచలన కామెంట్స్ అన్నీ ఇన్నీ కావు. అయితే ఇప్పటి వరకూ యూట్యూబ్‌కే అనుకుంటే తాజాగా ఆయన ఏకంగా మీడియా ముందుకొచ్చి మరోసారి అవును.. తాను చెప్పేవన్నీ నిజాలేనని ఆయన సెలవిచ్చారు.

బాబును కొట్టబోయారు..!

చంద్రబాబు కాంగ్రెస్‌ ఎమ్మెల్యేగా ఉన్న టైమ్‌లో ఉన్నప్పుడు కమ్మ, రెడ్డి అంటూ ముఠాలు కడుతున్నాడని ఒకానొక సందర్భంలో అప్పటి సీఎం మర్రి చెన్నారెడ్డి చేతిలోని స్టిక్‌తో బాబుని కొట్టబోయారని.. ఈ విషయాలు చాలా మందికి తెలియవని నాదెండ్ల అన్నారు. అంతేకాదు అప్పట్లో.. చంద్రబాబుని ఎవరూ చేరదీయకండని నాటి సీఎం కూడా పిలుపునిచ్చారన్నారు. తిరుపతి రైల్వేస్టేషన్‌లో చంద్రబాబు దొంగతనం చేసినట్లు కేసు ఉందని.. ఎస్ చంద్రబాబు దొంగతనం చేశారు.. ఇది నిజమేనన్నారు. అంతటితో ఆగని ఆయన యూ ట్యూబ్ చానెళ్లలో తాను ఎన్టీఆర్ గురించి విషయాలన్నీ వాస్తవాలేనని.. తాను చెప్పిన ప్రతీ మాటకూ కట్టుబడి ఉన్నానని నాదెండ్ల చెప్పుకొచ్చారు.

కాగా.. ఇప్పటికే ఎన్టీఆర్, చంద్రబాబు గురించి నానా హంగామా చేసిన నాదెండ్లపై పీకల్లోతు ఆగ్రహంతో ఉన్న తెలుగు తమ్ముళ్లకు ఆయన తాజా మాటలు మరింత కోపాన్ని పెంచినట్లయ్యాయి. అయితే నాదెండ్ల వ్యాఖ్యలపై చంద్రబాబు, టీడీపీ నేతల నుంచి ఎలాంటి స్పందన ఉంటుందో వేచి చూడాల్సిందే.