‘ఆనందో బ్రహ్మ’ సినిమా కామెడీ పండించి.. దివంగత ముఖ్యమంత్రి వైఎస్ రాజశేఖర్ రెడ్డి బయోపిక్‌ ‘యాత్ర’ ఎమోషనల్‌గా టచ్ చేసిన మహి వి. రాఘవ్.. ఈ సారి ఏకంగా ‘సిండికేట్’ సినిమాతో వచ్చేస్తున్నారు. కాగా.. ‘యాత్ర’ సినిమా సూపర్ డూపర్ హిట్టయిన తర్వాత సీక్వెల్‌గా ‘యాత్ర-2’ తెరకెక్కిస్తారని అప్పట్లో పెద్ద ఎత్తున వార్తలు వచ్చాయి. అయితే తాజాగా సీక్వెల్ కాదని.. ‘సిండికేట్’ అనే టైటిల్‌తో ప్రేక్షకుల ముందుకు వస్తున్నట్లు తేల్చిచెప్పారు. ఈ విషయాన్ని ప్రముఖ నిర్మాత, వైసీపీ నేత పీవీపీ ట్విట్టర్ ద్వారా తెలియజేశారు.

మహి ట్వీట్ సారాంశం ఇదీ..

‘ఆనందో బ్రహ్మ’, ‘యాత్ర’ చిత్రాల తర్వాత ఎలాంటి కథను చెప్పాలనుకునే నిర్ణయం కఠినమైనదే. ఓ దర్శకుడికి కథను చెప్పడం కంటే, ఎలాంటి కథను చెప్పాలి అనేదే ముఖ్యం. నిశ్శబ్దంలో ఉన్నప్పుడు దర్శకుడి మదిలో మెదిలే ఆలోచనే స్టోరీ. నా తదుపరి చిత్రం యాక్షన్ డ్రామా, టైటిల్ ‘సిండికేట్’ అని రాఘవ తన ట్విట్టర్‌లో ప్రకటించారు. కాగా ఈ ట్వీట్‌కు పీవీపీ రియాక్ట్ అవుతూ.. ‘మహి వి.రాఘవ్‌తో పాన్ ఇండియా చిత్రాన్ని నిర్మిస్తున్నాను’ అని ప్రకటించేశారు.

సో.. వీరిద్దరి కాంబోలో వచ్చే సినిమా ఎలా ఉంటుందో..? సిండికేట్‌కు నటీనటులెవరో..? ఎవర్ని హీరోగా ఎంచుకుంటారో..? అనేది మాత్రం ఇంత వరకూ తెలియరాలేదు. త్వరలోనే ఇందుకు సంబంధించిన పూర్తి వివరాలను దర్శకుడు, నిర్మాత వెల్లడించే అవకాశాలు కనిపిస్తున్నాయి.