உலகின் தலைசிறந்த சுவிஸ் நாட்டை சேர்ந்த வாட்ச் மேக்கரை இங்கிலாந்து நாட்டில் நடிகர் தனுஷ் சந்தித்த புகைப்படம் இணையத்தில் வைரல் ஆகி வருகிறது.

தமிழ் சினிமாவின் முன்னணி நடிகரான தனுஷ், திரைப்படங்கள் மட்டுமின்றி மற்ற விஷயங்களில் ஆர்வம் காட்டி வருகிறார். குறிப்பாக, கால்பந்து, கிரிக்கெட், டென்னிஸ் போன்ற விளையாட்டுகளை அவர் விரும்பி பார்ப்பார் என்பதும் குறிப்பிடத்தக்கது.

அதேபோல், தனுஷுக்கு விதவிதமான வாட்சுகள் வாங்குவதிலும் பெரும் விருப்பம் உள்ளது. உலகில் எங்கு வாட்ச் கண்காட்சி நடந்தாலும் அதை பார்க்க செல்வதை வழக்கமாகக் கொண்டுள்ளார். அந்த வகையில் சமீபத்தில், இங்கிலாந்து சென்றபோது அங்கு உலகின் தலைசிறந்த வாட்ச்மெக்கரான எப். பி. ஜோர்ன் என்பவரை சந்தித்துள்ளார்.

இது குறித்து தனது இன்ஸ்டாகிராம் பக்கத்தில் பதிவு செய்து, "உலகின் மிகப்பெரிய வாட்ச் மேக்கரை சந்தித்ததில் எனக்கு மிகவும் பெருமை," என்றும், "இதுவே தனக்கு மிகுந்த மகிழ்ச்சியை அளிக்கிறது," என்றும் தெரிவித்துள்ளார். இந்த புகைப்படம், அவரது இன்ஸ்டாகிராம் பக்கத்தில் பதிவிடப்பட்டுள்ள நிலையில், 5 லட்சத்துக்கு மேல் லைக்குகள் கிடைத்துள்ளது.

இந்த நிலையில், நடிகர் தனுஷ் தற்போது "குபேரா" மற்றும் "இட்லி கடை" ஆகிய படங்களில் நடித்து வருகிறார். மேலும், "நிலவுக்கு என் மேல் என்னடி கோபம்" என்ற படத்தையும் இயக்கி முடித்துள்ளார். இந்த மூன்று படங்களும் அடுத்தடுத்து திரைக்கு வரவிருக்கின்றன என்பதும் குறிப்பிடத்தக்கது.