యువ క‌థానాయ‌కుడు రామ్ ప్ర‌స్తుతం హ‌లో గురు ప్రేమ కోస‌మే చిత్రం చేస్తున్న సంగ‌తి తెలిసిందే. త్రినాథరావు న‌క్కిన ద‌ర్శ‌క‌త్వంలో రూపొందుతున్న ఈ చిత్రంలో అనుప‌మ ప‌ర‌మేశ్వ‌ర‌న్ క‌థానాయిక‌గా న‌టిస్తోంది. దేవిశ్రీ ప్ర‌సాద్ సంగీత‌మందిస్తున్న ఈ సినిమా ఈ ఏడాది ద్వితీయార్థంలో ప్రేక్ష‌కుల ముందుకు రానుంది. ఈ సినిమా విడుద‌ల‌య్యేలోపే దర్శకుడు ప్రవీణ్ సత్తారు దర్శకత్వంలో మ‌రో సినిమా ప‌ట్టాలెక్కించ‌నున్నారు రామ్‌. ఇటీవలే ఈ చిత్రం పూజా కార్యక్రమాలతో లాంచనంగా ప్రారంభ‌మ‌య్యింది.

ఈ నెల 7 నుంచి రెగ్యులర్ షూట్ మొదలుకానుంది.  యాక్ష‌న్‌, అడ్వెంచ‌ర్స్‌కు స్కోప్ ఉన్న ఈ సినిమా కోసం - 20 సెల్సియ‌స్ డిగ్రీల‌లో షూటింగ్ చేయ‌బోతున్నార‌ని చిత్ర బృందం ఇప్ప‌టికే పేర్కొంది. ఇదిలా ఉంటే.. ఈ సినిమాకి యువ సంగీత ద‌ర్శ‌కుడు మిక్కీ జె.మేయ‌ర్ సంగీత‌మందించ‌నున్నారు. గ‌తంలో రామ్‌, మిక్కీ కాంబినేష‌న్‌లో గ‌ణేష్ చిత్రం వ‌చ్చింది. మ‌ళ్ళీ తొమ్మిదేళ్ళ త‌రువాత వ‌స్తున్న సినిమా ఇదే కావ‌డం విశేషం.