గొడుగుతో పాటు గాల్లోకి ఎగిరిపోవడమేంటి..? అని కాసింత ఆశ్చర్యంగా అనిపిస్తోంది కదూ.. కాస్త ఈ విషయంపై క్లారిటీ వస్తే నిజమా..? అవునా అంటూ ముక్కున వేలేసుకుంటారు. ఇదిగో ఈ పక్కనున్న వీడియో చూడండి అసలు విషయం మీకే అర్థమవుతుంది. టర్కీలో జరిగిన ఈ ఘటన అందర్నీ సంభ్రమాశ్చర్యాలతో ముంచెత్తుతోంది. ప్రస్తుతం ఈ వీడియో, న్యూస్ నెట్టింట్లో పెద్ద ఎత్తున వైరల్ అవుతోంది. ఇంతకీ అసలేం జరిగింది..? గొడుగుతో పాటు గాల్లోకి మనిషి ఎలా వెళ్లిపోయాడు..? అనే విషయాలు ఇప్పుడు చూద్దాం.

టర్కీలోని.. ఒస్మానియే ప్రావిన్స్ .. మార్కెట్ లో సాదిక్ కొకడల్లీ ఓ దుకాణం ముందు జనాల కోసం గొడుగు ఏర్పాటు చేయడం జరిగింది. పక్కనే కూర్చోవడానికి కుర్చీలు సైతం ఉన్నాయి. అయితే ఒక్కసారిగా ఆ పరిసర ప్రాంతాల్లో ఈదురుగాలులు బలంగా వీయడంతో ఎక్కడికక్కడ వస్తువులన్నీ చెల్లాచెదరుగా పడిపోయాయి. గొడుగు కూడా పైకి లేచిపోయేంత గాలి వీస్తోంది.. దీంతో ఆ గొడుగును గాలికి నిలువరించాలని సదరు దుకాణం సిబ్బంది యత్నించారు. అయితే ఆ భారీ గొడుగుపై అడుగు భాగాన ఉన్న వెయిటేజీపై నిలబడ్డాడు. గొడుగు నిలబడకపోగా.. దాంతో పాటు ఆ వ్యక్తి కూడా గాల్లోకి ఎగిరిపోయాడు.

కాగా.. గొడుగుతో పాటు కొన్ని అడుగుల ఎత్తుకు ఎగిరిన తర్వాత (అనగా 3-4 మీటర్లు) ఆ వ్యక్తి గొడుగును వదిలేసి కిందికి దూకేశాడని.. అయితే అతనికి ఎలాంటి గాయాలు కాకుండా సేఫ్‌గానే బయటపడ్డాడని.. టర్కీకి చెందిన కొన్ని చానెళ్లు చెబుతున్నాయి. ఈ ఘటనకు సంబంధించి పూర్తి వివరాలు ఇంత వరకూ తెలియరాలేదు.

Strong winds lift a man in the air while he holds an umbrella in Turkey pic.twitter.com/2LCbyvVsDq

— IndiaGlitz™ l Telugu (@igtelugu) March 29, 2019