రాజ్ తరుణ్కు ప్ల‌స్ అవుతారా?
- IndiaGlitz, [Thursday,May 03 2018]
యువ క‌థానాయ‌కుడు రాజ్ తరుణ్ సినిమాలో తల్లి పాత్రలు చాలా ప్రభావం చూపిస్తాయి. ఒక విధంగా ఆ పాత్రలు రాజ్ తరుణ్ సినిమాల విజయానికి క‌లిసొచ్చిన అంశంగా కూడా చెప్పుకోవచ్చు. గతంలో ‘ఉయ్యాలా జంపాలా’ సినిమాలో అనితా చౌదరి.. ‘కుమారి 21ఎఫ్’లో హేమ.. ‘సీతమ్మ అందాలు రామయ్య సిత్రాలు’ చిత్రంలో సురేఖా వాణి.. ఇలా తెలుగు నటీమణులు తల్లి పాత్రలు పోషించిన సినిమాల్లో రాజ్ తరుణ్కు సింహభాగం విజయాలు అందించాయి.
కాగా.. ఈ ఏడాది ఆరంభంలో విడుదలైన ‘రంగుల రాట్నం’ సినిమాలో తొలిసారి తమిళ నటి సితార.. రాజ్ తరుణ్కు తల్లి పాత్రలో నటించారు. సంక్రాంతి కానుక‌గా విడుదలైన ఈ సినిమా ఆశించినంత విజయాన్ని అందించలేదు. మళ్ళీ ఇప్పుడు విడుద‌ల‌కు సిద్ధ‌మైన ‘రాజుగాడు’ సినిమాలోనూ మరోసారి సితార.. రాజ్ తరుణ్కు తల్లి పాత్రలో నటించారు. మరి ఈ సినిమాతో ఎలాగైనా విజయం సాధించాలని భావిస్తున్న రాజ్ తరుణ్కు.. సితార ఎంత వరకు కలిసొస్తారో చూడాలి.