రామ్ చ‌ర‌ణ్‌, సురేంద‌ర్ రెడ్డి.. ప్ర‌స్తుతం టాలీవుడ్ లో ఆస‌క్తిక‌రంగా ఉన్న కాంబినేష‌న్‌లో ఇదొక‌టి. త‌మిళంలో ఘ‌న‌విజ‌యం సాధించిన 'త‌ని ఒరువ‌న్' రీమేక్ కోసం ఈ ఇద్ద‌రూ క‌లిసి ప‌నిచేస్తున్నారు. క‌థానాయకుడిగా చ‌ర‌ణ్ కి మంచి ట్రాక్ రికార్డు ఉన్న‌ట్టే.. సూరికి కూడా ట్రాక్ రికార్డు బాగానే ఉంది. ఎటొచ్చి వీరిద్ద‌రి గ‌త చిత్రాలే ఘోరాతి ఘోరంగా ఫ్లాప్ అయ్యాయి. ఈ నేప‌థ్యంలో ఈ చిత్రం ఫ‌లితం ఎటువైపు వెళుతుందో అన్న‌ది ఆస‌క్తిదాయ‌క‌మే.

ఇంకా పేరు నిర్ణ‌యం కాని ఈ చిత్రాన్ని తొలుత ఆగ‌స్టులో రిలీజ్ చేయాల‌ని యూనిట్ భావించినా.. ద‌స‌రా కానుక‌గా అక్టోబ‌ర్ లో విడుద‌ల చేయాల‌న్న‌ది తాజా ఆలోచ‌న‌గా వెలుగులోకి వ‌చ్చింది. విశేష‌మేమిటంటే.. ఇదే అక్టోబ‌ర్‌లో ద‌స‌రా కానుక‌గా వ‌చ్చిన సురేంద‌ర్ చిత్రం 'ఊస‌ర‌వెల్లి' ఆశించిన విజ‌యం సాధించ‌లేదు. ఐదేళ్ల త‌రువాత అదే ఫీట్‌ని రిపీట్ చేస్తున్న సురేంద‌ర్ ఈ సారైనా ప‌రాజ‌యాన్ని అధిగ‌మిస్తాడేమో చూడాలి.