యూత్‌ఫుల్ చిత్రాల దర్శకుడు ఎ.కరుణాకరన్ దర్శకత్వంలో మెగాహీరో సాయిధరమ్ తేజ్, కేరళ కుట్టి అనుపమ పరమేశ్వరన్ జంటగా నటిస్తున్న చిత్రం ‘తేజ్‌ ది కూడా ఓ మంచి ప్రేమ కథ’ (ప్రచారంలో ఉన్న పేరు). శరవేగంగా చిత్రీకరణ జరుపుకుంటున్న ఈ చిత్రాన్ని.. యూత్‌తో పాటు అన్ని వర్గాల ప్రేక్షకులకి కనెక్ట్ అయ్యే విధంగా దర్శకుడు తెరకెక్కిస్తున్నారని సమాచారం. ఈ సినిమాని క్రియేటివ్ క‌మ‌ర్షియ‌ల్స్‌ పతాకంపై కె.ఎస్.రామారావు నిర్మిస్తున్నారు. కరుణాకరన్, కె.ఎస్.రామారావు కాంబినేషన్‌లో ఇది రెండో చిత్రం కావడం విశేషం. 

గతంలో వీరి కలయికలో విక్టరీ వెంకటేష్, భూమిక జంటగా నటించిన ‘వాసు’ (2002) సినిమా వ‌చ్చింది. అలరించే పాటలతో, బ్యూటీఫుల్ లవ్‌స్టోరీతో పాటు.. మంచి కుటుంబ కథా చిత్రంగా అన్ని వర్గాల ప్రేక్షకులను ఈ చిత్రం ఆకట్టుకున్నా.. ఆశించిన విజయాన్నైతే అందించలేదు. మ‌ళ్ళీ 16 సంవత్సరాల సుదీర్ఘ విరామం తర్వాత  కరుణాకరన్, కె.ఎస్.రామారావు కాంబినేషన్ తెరపైకి వచ్చింది.  జూన్‌లో విడుదల కాబోయే ఈ చిత్ర‌మైనా వీరికి విజయాన్ని అందిస్తుందో లేదో చూడాలి.