தமிழில் தற்போது திருநங்கை கேரக்டரில் நடிக்க பலரும் முன்வந்துள்ளனர். குறிப்பாக 'சூப்பர் டீலக்ஸ் படத்தில் திருநங்கை கேரக்டரில் விஜய்சேதுபதிக்கு பாராட்டுக்கள் குவிந்து வருகிறது. இந்த நிலையில் திருநங்கை கேரக்டரில் நடித்த படம் ஒன்று தேசிய விருதுக்கு பரிந்துரை செய்யப்பட்டுள்ளது.

பொதுவாக திருநங்கை கேரக்டரில் நடிகர்களே நடித்து வரும் நிலையில் இமேஜ் குறித்து சற்றும் கவலைப்படாமல் நடிகை ஸ்ரீபல்லவி, 'தாதா 87' என்ற படத்தில் திருநங்கையாக துணிச்சலாக நடித்திருந்தார். இந்த படம் எதிர்பார்த்த வரவேற்பை பெறவில்லை என்றாலும் ஸ்ரீபல்லவியின் நடிப்புக்கு பாராட்டுக்கள் குவிந்தது.

இந்த நிலையில் தற்போது திருநங்கையாக நடித்து அசத்திய ஸ்ரீபல்லவிக்கு சிறந்த நடிகைக்கான 2018-ஆம் ஆண்டுக்கான தேசிய விருது கிடைக்க பரிந்துரை செய்யப்பட்டுள்ளதாக தகவல்கள் வெளியாகியுள்ளது. திருநங்கைகளை பெண் என்று அழைப்பபோம் என்று இயக்குனர் விஜய்ஸ்ரீ இந்த படத்தில் அழுத்தமாக பதிவு செய்திருந்த நிலையில் இந்த படம் தேசிய விருது பெற்றால் நிச்சயம் அது வரவேற்கத்தக்க வகையில் இருக்கும் என்பது குறிப்பிடத்தக்கது.