'సాహో' అయినా క‌లిసొస్తుందా?
- IndiaGlitz, [Thursday,May 31 2018]
రవితేజ, ఇలియానా జంటగా నటించిన ‘ఖతర్నాక్’ (2006) సినిమాతో తెలుగు తెర‌కు విలన్‌గా పరిచయమయ్యారు మ‌ల‌యాళ నటుడు లాల్. ఈ సినిమాలో స్మగ్లర్‌గా నటించిన లాల్ తెలుగు ప్రేక్షకులకి సుపరిచితులే. కాగా.. ఇదే ఏడాది పవర్ స్టార్ పవన్ కల్యాణ్ హీరోగా నటించిన ‘అన్నవరం’ సినిమాలో కూడా విలన్‌గా గంగ పాత్రలో నటించారు. అయితే.. మలయాళంలో మంచి నటుడిగా తనదైన ముద్ర వేసుకున్న లాల్ తెలుగులో మాత్రం విలన్‌గా మెప్పించలేకపోయారు.
అంతేగాకుండా.. లాల్ విలన్‌గా నటించిన ఈ రెండు సినిమాలు కూడా బాక్సాఫీస్ దగ్గర పెద్దగా సందడి చేయలేకపోయాయి. దాంతో తెలుగు సినిమాలకు కాస్త దూరం అయ్యారు ఈ మలయాళం నటుడు. కట్ చేస్తే.. 12 సంవత్సరాల గ్యాప్ తర్వాత మళ్ళీ తెలుగులో నటించడానికి సిద్ధమయ్యారు. ఆ వివరాల్లోకి వెళితే.. యంగ్ రెబల్ స్టార్ ప్రభాస్, బాలీవుడ్ బ్యూటీ శ్రద్ధా కపూర్ జంటగా సుజిత్ దర్శకత్వంలో తెర‌కెక్కుతున్న సినిమా ‘సాహో’. యాక్షన్ ఎంటర్‌టైనర్‌గా రూపుదిద్దుకుంటున్న ఈ సినిమాలో లాల్ ఓ కీలక పాత్రలో కనిపించనున్నారు. మరి గత రెండు సినిమాల మాదిరి కాకుండా ‘సాహో’తోనైనా లాల్ తెలుగులో విజ‌యాన్ని అందుకుంటారేమో చూడాలి. మొత్తానికి.. ఫ‌లితాల మాటెలా ఉన్నా టాప్ హీరోల సినిమాల్లోనే లాల్ న‌టిస్తుండ‌డం విశేషం.