ప‌వ‌న్ క‌ల్యాణ్ కి ఈ ఎన్నిక‌ల్లో ఎన్ని సీట్లు వ‌స్తాయి? ఆయ‌న టీడీపీతో పొత్తు పెట్టుకుంటారా? పెట్టుకోరా... ఇది జ‌నాల్లో జ‌రుగుతున్న చ‌ర్చ‌. కానీ ఇండ‌స్ట్రీలో చ‌ర్చ ఇంకోలా ఉంది. ప‌వ‌న్ సినిమాలు చేస్తారా? చేయ‌రా? చేస్తే ఎవ‌రితో చేస్తారు? రిజ‌ల్ట్ వ‌చ్చిన త‌ర్వాత ఆయ‌న రెండు సినిమాల్లో న‌టించే అవ‌కాశం ఉంద‌ట‌. అందులో ఒక‌టి ఆయ‌న స్నేహితుడు రామ్ తాళ్లూరి నిర్మాణంలో ఉండ‌వ‌చ్చ‌ని వినికిడి. ఎన్నారై రామ్ తాళ్లూరికి ప‌వ‌న్ క‌ల్యాణ్‌తో మంచి అనుబంధ‌మే ఉంది.

రామ్ తాళ్లూరి ఇప్ప‌టిదాకా ఇండ‌స్ట్రీలో రెండు సినిమాలే చేసినా, ఆ సినిమాలు హిట్ కాలేదు. ఇప్పుడు మ‌ళ్లీ ఆయ‌న ర‌వితేజ‌తోనే ఓ సినిమా చేస్తున్నా, ఆ చిత్రం ఆశించినంత వేగంగానూ జ‌ర‌గ‌డం లేదు. అందుకే రామ్ తాళ్లూరిని ప‌రిశ్ర‌మ‌లో నిల‌బెట్ట‌డానికి ప‌వ‌న్ క‌ల్యాణ్ ఓ చిత్రం చేయాల‌ని అనుకుంటున్నార‌ట‌. ప‌వ‌న్ క‌ల్యాణ్ సినిమా చేస్తారా లేదా అనేది వేరే విష‌యం. చేయ‌డ‌మంటూ జ‌రిగితే మాత్రం డాలీ ద‌ర్శ‌క‌త్వంలో రామ్ తాళ్లూరి నిర్మాణంలో సినిమా ఉంటుంద‌ని టాక్‌. ఏం జ‌రుగుతుందో వెయిట్ అండ్ సీ.