கோலிவுட்டின் லேடி சூப்பர் ஸ்டார் நயன்தாரா தற்போது அஜித்தின் விசுவாசம்' படத்தில் நடிக்கவுள்ளார். அதுமட்டுமின்றி கமல்ஹாசனின் 'இந்தியன் 2' மற்றும் ரஜினிகாந்த்-கார்த்திக் சுப்புராஜ் ஆகிய படங்களில் நடிக்க பேச்சுவார்த்தை நடத்தி வருவதாக செய்திகள் வெளிவந்து கொண்டிருக்கின்றன. இந்த நிலையில் முன்னாள் முதல்வர் ஒருவரின் வாழ்க்கை வரலாற்று படத்தில் முக்கிய வேடத்தில் நடிக்கவும் அவரிடம் பேச்சுவார்த்தை நடந்து வருவதாக கூறப்படுகிறது.

ஆந்திரமாநில முன்னாள் முதல்வர் ராஜசேகர ரெட்டி முதல்வராக இருக்கும்போது திடீரென ஹெலிகாப்டர் விபத்தில் மரணம் அடைந்தது தெரிந்ததே. அவரது மரணத்தில் மர்மம் இருப்பதாக கூறப்பட்டு வரும் நிலையில் அவருடைய வாழ்க்கை வரலாறு திரைப்படத்தை பிரபல தெலுங்கு இயக்குனர் மாஹி ராகவ் இயக்க திட்டமிட்டுள்ளார்.

ராஜசேகர ரெட்டி கேரக்டரில் மலையாள சூப்பர் ஸ்டார் மம்முட்டி நடிக்கவுள்ளதாகவும், அவருக்கு ஜோடியாக நடிக்க நயன்தாராவிடம் பேச்சுவார்த்தை நடத்தப்பட்டு வருவதாகவும் கூறப்படுகிறது. ஏற்கனவே இருவரும் புதிய நியமம்', பாஸ்கர் தி ராஸ்கல் உள்பட ஒருசில வெற்றிப்படங்களில் நடித்துள்ளனர் என்பது குறிப்பிடத்தக்கது.