முன்னாள் முதல்வர் ஜெயலலிதாவின் சொத்துக்களுக்கு அவருடைய ரத்த சொந்தங்களும் அவருக்கு நெருக்கமாக இருந்தவர்களும் உரிமை கொண்டாடி வரும் நிலையில் அவருக்கு சொந்தமான ஐதராபாத்தில் உள்ள சொத்துக்களை தெலுங்கானா அரசு ஏற்க வேண்டும் என்று ஐதராபாத் ஐகோர்ட்டில் வழக்கு ஒன்று பதிவு செய்யப்பட்டுள்ளது.

மறைந்த முதல்வர் ஜெயலலிதாவுக்கு ஐதராபாத்தில் உள்ள பேட்பஷிராபாத் என்ற பகுதியில் ஜிடி மெட்லா, ஹொம்பள்ளி ஆகிய இடங்களில் 4 ஏக்கர் மற்றும் 7 ஏக்கர் பரப்பளவில் ஜெ.ஜெ.கார்டன் என்ற பெயரில் சொத்துக்கள் உள்ளன. இந்த சொத்துக்கள் ஜெயலலிதாவின் ரத்த சொந்தத்தில் உள்ள உறவுப்பெண் ஒருவரின் பெயருக்கு அவர் உயில் எழுதி வைத்துள்ளதாக அந்த பகுதியின் சார்பதிவாளர் அலுவலகம் தெரிவித்துள்ளது.

மேலும் ஐதராபாத் ஸ்ரீநகர் காலனியிலும் ஜெயலலிதாவுக்கு சொந்தமான வீடு ஒன்று உள்ளது. இந்த வீட்டை அவர் தனியார் நிறுவனம் ஒன்றுக்கு வாடகைக்கு கொடுத்துள்ளார்.

இந்நிலையில் இந்த வீடும், ஜெ.ஜெ.கார்டன் சொத்துக்களையும் தெலுங்கானா அரசே ஏற்று நிர்வாகம் செய்ய வேண்டும் என்று கரிப் கைடு அமைப்பின் தலைவர் பார்கவி என்பவர் ஐதராபாத் ஐகோர்ட்டில் மனு ஒன்றை தாக்கல் செய்துள்ளார். இந்த வழக்கு விரைவில் விசாரணைக்கு வரும் என்று எதிர்பார்க்கப்படுகிறது.