ఒకప్పుడు ఎన్టీఆర్ - చక్రవర్తి, ఏఎన్నార్ – కె.వి.మహదేవన్.. కాంబినేష‌న్‌లో పాటలంటే అవి గ్యారంటీగా హిట్ అనే న‌మ్మ‌కం ఉండేది. ఇక ఆ తర్వాత కాలంలో కృష్ణ - చక్రవర్తి, చిరంజీవి - ఇళయరాజా, నాగార్జున – కీరవాణి కాంబినేషన్స్‌లో పాటలు ఎంత పెద్ద హిట్టో వేరేగా చెప్ప‌న‌క్కర‌లేదు.

అయితే.. ఇప్పుడున్న‌ పరిస్థితుల్లో హీరో – మ్యూజిక్ డైరెక్టర్ హిట్ కాంబినేషన్ అన్న‌ది చాలా అరుదుగా కనిపిస్తూ ఉంటుంది. అటువంటి అరుదైన కలయికే సూర్య – హారిస్ జయరాజ్‌ది. వీరి కలయిక 'కాక్క కాక్క‌' (తెలుగులో 'ఘర్షణ')తో మొదలై.. 'గజిని', 'సూర్య సన్నాఫ్ కృష్ణన్', 'వీడొక్కడే', 'ఘటికుడు', '7th సెన్స్', 'బ్రదర్స్', 'ఎస్-3' వరకు విజయవంతంగా కొనసాగింది.

ఇక సూర్య కెరీర్‌లో 37వ చిత్రంగా తెరకెక్కుతున్న సినిమాకి కూడా హారిస్ జయరాజ్ సంగీతం అందించ‌నున్నారు. ఇదిలా ఉంటే.. ప్ర‌స్తుతం సూర్య సోదరుడు కార్తి హీరోగా నటిస్తున్న 'దేవ్' చిత్రానికి హారిస్ జయరాజ్ సంగీత దర్శకత్వం వహిస్తున్నారు. మరి కార్తి సినిమాకి తొలిసారి సంగీతాన్ని అందిస్తున్న హారిస్ జయరాజ్.. అన్న సూర్య లాగే త‌మ్ముడు కార్తికి కూడా మంచి సక్సెస్‌ఫుల్ మ్యూజికల్ ఆల్బమ్‌ని రూపొందిస్తారేమో చూడాలి.