దిల్‌రాజు మళ్ళీ సిక్సర్ కొడతారా?
- IndiaGlitz, [Thursday,January 31 2019]
ప్రముఖ నిర్మాత దిల్‌రాజు 2017లో సిక్సర్ కొట్టారు. 'శతమానం భవతి', 'నేను లోకల్', 'డీజే', 'ఫిదా', 'రాజా ది గ్రేట్', 'ఎంసీఏ'... శ్రీ వెంకటేశ్వర క్రియేషన్స్ నుంచి ఆరు సినిమాలు విడుదలతే, ఆరూ విజయాలతో పాటు లాభాలు తీసుకొచ్చాయి. 2018లోనూ సిక్సర్ కొట్టాలని దిల్ రాజు ప్రయత్నించారు. కానీ, కుదరలేదు. మూడు సినిమాలు నిర్మిస్తే.. మూడూ ఆశించిన విజయాలు ఇవ్వలేదు. అయితే.. ఈ ఏడాది ఆయనకు కలసి వచ్చేలా ఉంది. మళ్ళీ సిక్సర్ కొట్టే ఛాన్స్ ఉన్నట్టే కనిపిస్తుంది.
సంక్రాంతికి విడుదలైన 'ఎఫ్ 2' దిల్‌రాజుకు ఈ ఏడాది మొదటి విజయాన్ని అందించింది. ఏప్రిల్ నెలలో మహేష్ బాబు 'మహర్షి' విడుదల కానుంది. అశ్వినీదత్, పివిపితో కలిసి దిల్ రాజు నిర్మిస్తున్న చిత్రమిది. ఇది కాకుండా.. మరో మూడు సినిమాలు శ్రీ వెంకటేశ్వర క్రియేషన్స్ లో తెరకెక్కుతున్నాయి. శర్వానంద్, సమంత జంటగా తమిళ హిట్ '96' రీమేక్ చేస్తున్నారు దిల్ రాజు. రాజ్ తరుణ్ హీరోగా 'నాదీ నీదీ ఒకే లోకం' ఈ రోజు ప్రకటించారు. నాగచైతన్య హీరోగా కొత్త దర్శకుడిగా ఒక సినిమా చేస్తామని అన్నారు. వీటితో మొత్తం ఐదు సినిమాలు అవుతాయి. మరో సినిమా పూర్తి చేస్తే సిక్సర్ కొట్టేయొచ్చు.