'யோகன் அத்தியாயம் ஒன்று' டிராப் ஆனது ஏன்? மனம் திறந்த கவுதம்மேனன்
- IndiaGlitz, [Tuesday,July 03 2018]
பிரபல இயக்குனர் கவுதம் மேனன் இயக்கத்தில் தளபதி விஜய் நடிப்பில் 'யோகன் அதிகாரம் ஒன்று' என்ற திரைப்படம் கடந்த சில வருடங்களுக்கு முன்னர் அறிவிக்கப்பட்டது. முழுக்க முழுக்க அமெரிக்காவில் படமாக்க திட்டமிட்டிருந்த இந்த படத்தின் படப்பிடிப்பு தொடங்கும் முன்பே இந்த படம் டிராப் ஆனதாக செய்திகள் வெளிவந்தது.
இந்த நிலையில் சமீபத்தில் பேட்டி ஒன்றில் இயக்குனர் கவுதம்மேனன் இந்த படம் டிராப் ஆனது ஏன்? என்பது குறித்து தெரிவிக்கையில், 'விஜய் எப்போதுமே தான் நடிக்கும் படத்தின் முழு ஸ்கிரிப்டையும் கேட்ட பின்னர் திருப்தி அடைந்தால் மட்டுமே நடிக்க ஒப்புக்கொள்வார். முதலில் நான் கூறிய ஒன்லைன் கதையை கேட்ட விஜய்க்கு பின்னர் நான் இந்த படத்தின் 75% ஸ்கிரிப்டை மட்டுமே கூறினார். அதற்கு அவர் 'முழுவதுமாக முடித்துவிட்டு சொல்லுங்கண்ணா' என்று கூறினார். நான் தான் முழுவதையும் முடிக்காமல் காலதாமதம் செய்துவிட்டேன். அதனால் தான் அந்த படம் டிராப் ஆனது' என்று தன்னுடைய தவறை ஒப்புக்கொண்டுள்ளார்.
இருப்பினும் இந்த படத்தின் முழு ஸ்கிரிப்டையும் எழுதி முடித்துவிட்டு விரைவில் விஜய்யை சந்தித்து இந்த படத்தின் கதையை கூற எனக்கு வாய்ப்பு கிடைக்கும் என நம்புவதாகவும் கவுதம் மேனன் அந்த பேட்டியில் கூறியுள்ளார்.
இயக்குனர் கவுதம்மேனன் தற்போது விக்ரம் நடித்து வரும் 'துருவ நட்சத்திரம்' மற்றும் தனுஷ் நடித்து வரும் 'எனை நோக்கி பாயும் தோட்டா' ஆகிய படங்களை இயக்கி வருகிறார் என்பது குறிப்பிடத்தக்கது.