ఆర్జీవీ ప్రెస్‌మీట్‌ను పోలీసులు ఎందుకు అడ్డుకున్నారంటే...
- IndiaGlitz, [Sunday,April 28 2019]
టాలీవుడ్ వివాదాస్పద దర్శకుడు రామ్గోపాల్ వర్మ విజయవాడలో ప్రెస్మీట్ పెట్టేందుకు యత్నించి విఫలమైన సంగతి తెలిసిందే. నోవాటెల్‌లో ప్రెస్మీట్ నిర్వహించేందుకు సిబ్బంది నో చెప్పడంతో హోటల్స్, క్లబ్స్ ఏవీ ఖాళీలేకపోవడంతో ఆఖరికి నడిరోడ్డుపై ప్రెస్మీట్ పెట్టేందుకు 'లక్ష్మీస్ ఎన్టీఆర్' చిత్రబృందం ఫిక్స్ అయ్యింది. ఆదివారం మధ్యాహ్నం 4గంటలకు ప్రెస్మీట్ పెట్టాలని నిర్ణయించింది.
ఆర్జీవీ, రాకేశ్‌రెడ్డితో పాటు చిత్రబృందం హైదరాబాద్ నుంచి విజయవాడకు బయల్దేరింది. సమాచారం అందుకున్న పోలీసులు గన్నవరం ఎయిర్‌పోర్ట్‌లోనే బలవంతంగా అరెస్ట్ చేశారు. అయితే.. పోలీసులు ఎందుకు అరెస్ట్ చేశారు..? అరెస్ట్ చేయడానికి కారణాలేంటి..? అనే విషయాలను ఓ ప్రకటన విడుదల చేశారు.
ఇవీ కారణాలు..
ఎలక్షన్ కోడ్ అమలులో ఉన్న కారణంగా విజయవాడలో సెక్షన్ 30 పోలీస్ యాక్ట్ మరియు సెక్షన్ 144 అమలులో ఉన్నాయి.
ఇవి అమలులో ఉన్న కారణంగా బహిరంగ ప్రదేశాలలో ఎటువంటి సభలు, సమావేశాలు పెట్టాలన్నా ముందస్తు పోలీసుల అనుమతి తీసుకోవాల్సిందే
రాంగోపాల్ వర్మ ఎంచుకున్న ప్రదేశమైన పైపులరోడ్ నిత్యం హైదరాబాద్ వెళ్లే వాహనాలతో రద్దీగా ఉంటుంది. అంతేకాకుండా వారు పెట్టుకునే సమావేశం వలన కొన్ని అత్యవర సర్వీసులకు కూడా ఆటంకం కలిగే అవకాశం ఉంది.
రాం గోపాల్ వర్మ ఏర్పాటు చేసే ప్రెస్ మీట్ వలన రెండు వర్గాల మధ్య ఘర్షణలకు దారితీసే అవకాశం ఉంది.
ఒకవేళ ఈ కార్యక్రమం బహిరంగ ప్రదేశంలో నిర్వహిస్తున్న కారణంగా ఎవరినన్నా కించపరిచేలా అనుచిత వ్యాఖ్యలు చేసి, శాంతి భద్రతలకు విఘాతం కలిగినా..ఆస్థి, ప్రాణ నష్టం జరిగినా...నిర్వాహకులంతా భాద్యులే.
శాంతి భద్రతలకు పూర్తిగా విఘాతం కలిగే అవకాశం ఉందని సమాచారం రావడంతో ఈ కార్యక్రమం నిర్వహించుకునేందుకు రాం గోపాల్ వర్మకు అనుమతి ఇవ్వలేదు. ఈ అంశాల కారణంగా రాంగోపాల్ వర్మకు అనుమతి ఇవ్వలేదని పోలీసులు ప్రకటన జారీ చేశారు.