టీడీపీ అధినేత చంద్రబాబు ప్రజాస్వామ్యాన్ని పరిరక్షించాల్సిందిపోయి.. కాలరాస్తున్నాడని వైసీపీ సీనియర్ నేత విజయచందర్‌ ధ్వజమెత్తారు. ఆదివారం విజయవాడలో సినీ దర్శకుడు రాంగోపాల్‌వర్మ ప్రెస్‌మీట్ అడ్డగింత, బలవంతంగా ఎయిర్‌పోర్టు నుంచి బయటకు పంపడం ఈ వ్యవహారంపై మీడియాతో మాట్లాడిన ఆయన టీడీపీ సర్కార్‌పై కన్నెర్రజేశారు. రాం గోపాల్‌వర్మ ప్రెస్‌మీట్‌ పెడితే మీకు అభ్యంతరం ఏంటీ..? ప్రెస్‌మీట్‌ పెట్టేందుకు కూడా పర్మిషన్‌ తీసుకోవాలా..? అని ఈ సందర్భంగా ఆయన నిలదీశారు.

ఎందుకంత భయం..?

దేశంలోని ఏ మారుమూల ప్రాంతానికైనా వెళ్లే హక్కు భారత రాజ్యాంగం దేశ పౌరులకు కల్పించిందని, కానీ చంద్రబాబు ప్రజాస్వామ్యాన్ని కాలరాసే విధంగా వ్యవహరిస్తున్నారని తీవ్ర స్థాయిలో మండిపడ్డారు. స్వర్గీయ ఎన్టీఆర్‌ జీవితం ఆధారంగా తెరకెక్కిన మహానాయకుడు, కథానాయకుడు సినిమాలకు గొప్పగా పబ్లిసిటీ ఇప్పించిన చంద్రబాబు.. లక్ష్మీస్‌ ఎన్టీఆర్‌ సినిమా అంటే ఎందుకు భయపడుతున్నారని ప్రశ్నించారు. లక్ష్మీస్‌ ఎన్టీఆర్‌ సినిమా చూస్తే వాస్తవాలన్నీ బయటపడతాయని భయపడుతున్నారా..? అని నిలదీశారు.

వచ్చేది వైసీపీ ప్రభుత్వమే..!

ఆర్టికల్‌ 19లో ప్రతి ఒక్కరూ తమ భావాలను వ్యక్త పరచవచ్చని ఉందని, 40 ఏళ్ల రాజకీయ అనుభవం ఉందని చెప్పుకునే చంద్రబాబుకు ఇది కూడా తెలియదా..? అని విజయచందర్‌ నిలదీశారు. చంద్రబాబు వ్యవహార శైలి చూస్తుంటే ఆయన మానసిక స్థితిపై అనుమానంగా ఉందన్నారు. గన్నవరం ఎయిర్‌పోర్టు నుంచి రాంగోపాల్‌వర్మను ఎందుకు వెనక్కు పంపించారో చంద్రబాబు సమాధానం చెప్పాలన్నారు. ఇంకో 20 రోజులు మాత్రమే చంద్రబాబు ప్రభుత్వం ఉంటుందని, ఆ తరువాత వచ్చేది వైసీపీ ప్రభుత్వమేనని ఆయన చెప్పుకొచ్చారు.