பிக்பாஸ் நிகழ்ச்சியின் 100 நாள் திருவிழா ஒருவழியாக முடிந்துவிட்டது. ஓவியா ஆர்மி, ஓவியா புரட்சி படையினர்களின் எதிர்ப்பையும் மீறி ஆரவ் வெற்றி பெற்றுவிட்டார். இந்த வெற்றி குறித்து சமூக வலைத்தளங்களில் பல்வேறு கருத்துக்கள் பரிமாறி வருகின்றன.

இந்த நிலையில் சத்தமில்லாமல் அந்த டிவி சேனல் பிக்பாஸ் 2 நிகழ்ச்சிக்கான பணிகளை தொடங்கிவிட்டது. முதல் பாகத்தை தொகுத்து வழங்கிய கமல்ஹாசனே இரண்டாம் சீசனையும் தொகுத்து வழங்குவார் என்றே கருதப்பட்டது.

ஆனால் 'இந்தியன் 2' மற்றும் அரசியல் பணிகள் காரணமாக இந்த நிகழ்ச்சியின் இரண்டாம் பாகத்தை தொகுத்து வழங்க கமல் சம்மதிப்பாரா? என்ற கேள்வி எழுந்துள்ளது. இந்த நிலையில் நடிகர் சூர்யாவிடம் சேனல் நிர்வாகிகள் பேச்சுவார்த்தை நடத்தி வருவதாக கூறப்படுகிறது. ஏற்கனவே இதே சேனல் நடத்திய 'நீங்களும் வெல்லலாம் ஒரு கோடி' நிகழ்ச்சியை நடத்தியவர் தான் சூர்யா என்பதால் அவர் இந்த நிகழ்ச்சியை தொகுத்து வழங்க ஒப்புக்கொள்வார் என்றே கருதப்படுகிறது.

இருப்பினும் பிக்பாஸ் நிகழ்ச்சியை சீனியர் ஒருவர் தொகுத்து வழங்கினால்தான் சரியாக இருக்கும் என்பது பலரது அறிவுரையாக உள்ளது. அந்தவகையில் சரத்குமார் சரியான தேர்வாக இருக்கும் என்று சமூகவலைத்தளங்களில் கருத்துக்கள் தெரிவிக்கப்பட்டு வருகிறது.