నాగ్, ఆర్జీవీ చిత్రానికి ఆ ఇద్దరిలో ఎవరో?
- IndiaGlitz, [Tuesday,February 20 2018]
కింగ్ నాగార్జున, సంచ‌ల‌న ద‌ర్శ‌కుడు రాంగోపాల్ వ‌ర్మ కాంబినేష‌న్‌లో ఓ సినిమా తెర‌కెక్కుతున్న విష‌యం విదిత‌మే. దాదాపు రెండున్న‌ర ద‌శాబ్దాల త‌ర్వాత.. వీరిద్ద‌రి క‌ల‌యిక‌లో వ‌స్తున్న సినిమా కావ‌డంతో అటు ప్రేక్ష‌కులు, అభిమానుల‌తో పాటు, ఇటు ప‌రిశ్ర‌మ‌లో కూడా ఆస‌క్తి నెల‌కొంది. ప్ర‌స్తుతం ముంబైలో శ‌ర‌వేగంగా చిత్రీక‌ర‌ణ జ‌రుపుకుంటున్న ఈ చిత్రానికి 'సిస్ట‌మ్', 'గ‌న్', 'శ‌ప‌థం' పేర్లను ప‌రిశీలిస్తున్నారు. ఇందులో నాగ్ పోలీస్ ఆఫీస‌ర్‌గా క‌నిపించ‌నుండ‌గా.. అత‌నికి జోడీగా నూత‌న క‌థానాయిక మైరా స‌రీన్ న‌టిస్తోంది. వ‌ర్మ కంపెనీ నిర్మిస్తున్న ఈ సినిమాని.. మార్చి నెలాఖ‌రులోగా చిత్రీక‌ర‌ణ పూర్తి చేసి ఏప్రిల్‌లో విడుద‌ల చేయ‌డానికి స‌న్నాహాలు జ‌రుగుతున్నాయి.
ఇదిలా ఉంటే.. ఇప్ప‌టివ‌ర‌కు ఈ చిత్రానికి సంగీత ద‌ర్శ‌కుడు ఎవ‌రు? అన్న‌దానిపై క్లారిటీ రాలేదు. దీనికి సంబంధించి ప్ర‌స్తుతం టాలీవుడ్‌లో కొన్ని ఆస‌క్తిక‌ర‌మైన క‌థ‌నాలు వినిపిస్తున్నాయి. ఆ క‌థనాల ప్ర‌కారం.. గ‌తంలో వ‌ర్మ తెర‌కెక్కించిన 'వంగ‌వీటి' , 'ఎటాక్', 'స‌ర్కార్ 3' వంటి చిత్రాల‌కు సంగీతం అందించిన ర‌విశంక‌ర్ ఈ చిత్రానికి కూడా స్వ‌రాల‌ను స‌మ‌కూరుస్తున్నార‌ని తెలిసింది. అలాగే.. నాగ్‌కి ఎంతో ఇష్ట‌మైన కీర‌వాణి పేరు కూడా ఈ సినిమాకి సంగీత ద‌ర్శ‌కుడిగా వినిపిస్తోంది. త్వ‌ర‌లోనే ఈ విష‌యంపై క్లారిటీ వ‌స్తుంది.