தெலுங்கு சூப்பர் ஸ்டார் மகேஷ்பாபு நடிப்பில் பிரபல இயக்குனர் ஏ.ஆர்.முருகதாஸ் இயக்கத்தில் உருவாகி வரும் படத்தின் டைட்டில் 'ஸ்பைடர்' என்பதை நேற்று பார்த்தோம். மகேஷ்பாபுவின் முதல் நேரடி தமிழ்ப்படமான இந்த படம் மகேஷ்பாபுவுக்கு ஏராளமான தமிழ் ரசிகர்களை சம்பாதித்து கொடுக்கும் என்று எதிர்பார்க்கப்படுகிறது.

இந்த நிலையில் மகேஷ்பாபு அளித்த பேட்டி ஒன்றில் தான் சென்னையை சேர்ந்தவர் என்றும் பள்ளி மற்றும் கல்லூரி படிப்பு தனக்கு சென்னையில் தான் அமைந்தது என்றும் குறிப்பிட்டார்

மேலும் கடந்த சில வருடங்களுக்கு முன்னர் இயக்குனர் மணிரத்னம் 'பொன்னியின் செல்வன்' படத்தை இயக்க முயற்சி செய்தபோது 'என்னையும் விஜய்யையும் நடிக்க பேச்சுவார்த்தை நடத்தியதாகவும் ஆனால் ஒருசில காரணங்களால் அந்த படம் தொடங்க முடியாமல் போய்விட்டதாகவும் கூறினார்.

தற்போது 'பாகுபலி' உள்பட ஒருசில சரித்திர படங்கள் ஹிட் ஆகிவருவதால் விரைவில் மணிரத்னம் 'பொன்னியின் செல்வன்' படத்தை தொடங்க வேண்டும் என்று விஜய் மற்றும் மகேஷ்பாபு ரசிகர்கள் வேண்டுகோள் விடுத்துள்ளனர்.