தனியார் தொலைக்காட்சி ஒன்றில் கமல்ஹாசன் நடத்தி வரும் பிக்பாஸ் நிகழ்ச்சி இந்த அளவுக்கு சர்ச்சையாகும் என்று யாரும் நினைத்திருக்க மாட்டார்கள். முதலில் மிமி கிரியேட்டர்களின் கலாய்புக்கு ஆளான இந்த நிகழ்ச்சி பின்னர் போலீஸ் புகார், கைது செய்ய வலியுறுத்தல் என்ற அளவுக்கு சீரியஸ் ஆகிவிட்டது.

இந்த நிகழ்ச்சிக்கு எதிர்ப்பு தெரிவித்து மாணவர்கள் மற்றும் ஒரு அமைப்பு நேற்று கமல் வீட்டு முன் போராட்டம் நடத்தினர். கமலுக்கு எதிராக ஒரு குரூப் கிளம்பியிருக்கும் நிலையில் அவருக்கு ஒரு பிரச்சனை என்றால் திரையுலகமே அவருக்கு பின்னாள் திரண்டு நிற்கும் என்று நடிகர் சங்க செயலாளரும், தயாரிப்பாளர் சங்க தலைவருமான விஷால் கூறியுள்ளார்.

நேற்று தலைமைச்செயலகத்தில் தமிழக அரசு அறிவித்த விருது அறிவிப்புக்கு நன்றி தெரிவித்து கொண்ட விஷால், பின்னர் செய்தியாளர்களிடம் கமல் பிரச்சனை குறித்து கூறியபோது, 'கமல்ஹாசன் ஒரு விஷயத்தில் இறங்கினால் அதுகுறித்து முழுமையாக தெரிந்து கொண்டுதான் இறங்குவார். பிக்பாஸ் என்பது ஒரு ரியாலிட்டி நிகழ்ச்சி. தவறான நிகழ்ச்சி என்றால் கமல் கண்டிப்பாக அதில் பங்கேற்க மாட்டார். அதே நேரத்தில் அவரை ஒருமையில் பேசியதை அமைச்சர் தவிர்த்திருக்கலாம். மேலும் கமல்ஹாசனுக்கு ஒரு பிரச்சனை என்றால் திரையுலகமே அவர் பின்னாள் நின்று ஆதரவு வழங்கும்' என்று கூறினார்.