பிரபல தொலைக்காட்சி விஜே ரம்யா சுப்பிரமணியம், திரைப்படங்களிலும் அவ்வப்போது நடித்து வருகிறார் என்பது தெரிந்ததே. மணிரத்னம் இயக்கிய 'ஓகே கண்மணி, சூர்யாவின் 'மாஸ்', ஜெயம் ரவியின் 'வனமகன்' போன்ற படங்களில் நடித்த ரம்யா தற்போது மேலும் ஒரு படத்தில் நடிக்கவுள்ளார் என்ற செய்தி வெளிவந்துள்ளது

சமுத்திரக்கனி முக்கிய வேடத்தில் நடிக்கும் 'சங்கத்தலைவன்' என்ற படத்தில் ரம்யா முக்கிய வேடத்தில் நடிக்க ஒப்பந்தமாகியுள்ளதாக கூறப்படுகிறது. மணிமாறன் என்பவர் இயக்கும் இந்த படம் சேலம், ஈரோடு மற்றும் திருப்பூர் பகுதிகளில் வசிக்கும் கைத்தறி நெசவாளர்களின் பிரச்சனையை அலசும் படம் என்றும் இந்த படம் ஒரு நாவலை தழுவி எடுக்கப்படவுள்ளதாகவும் படக்குழுவினர் தெரிவித்துள்ளனர். இந்த படத்தில் சமுத்திரக்கனி கைத்தறி நெசவாளர் சங்கத்தலைவராக நடிக்கின்றார்.

வெற்றிமாறன் தயாரிக்கும் இந்த படத்திற்கு வேல்ராஜ் ஒளிப்பதிவும், வெங்கடேஷ் படத்தொகுப்பு பணியும் செய்கின்றனர். இந்த படத்தில் நடிக்கும், நடிகர் நடிகைகள் மற்றும் தொழில்நுட்ப கலைஞர்கள் குறித்த அறிவிப்பு இன்னும் ஒருசில நாட்களில் வெளியாகவுள்ளது.