சினிமாவில் நாயகியாகும் மற்றொரு விஜே!
- IndiaGlitz, [Saturday,February 06 2021]
தொலைக்காட்சிகளில் விஜே ஆக பணிபுரிந்து கொண்டிருக்கும் பலர் பெரிய திரையிலும் நடித்து வருகின்றனர் என்பதும் விஜய் டிவி புகழ் டிடி, ரம்யா, ஜாக்குலின் உள்பட பலர் திரையுலகில் நடித்து வருகின்றனர் என்பதும் தெரிந்ததே. அந்த வகையில் தற்போது விஜேயாக பணிபுரிந்த மேலும் ஒருவர் பெரிய திரையில் ஹீரோயினியாக நடித்து வருகிறார்.
பிரதமர் நரேந்திர மோடி மற்றும் முதல்வர் எடப்பாடி பழனிச்சாமி ஆகியோர் கலந்து கொண்ட நிகழ்ச்சி உள்பட ஒருசில சினிமா மற்றும் பொது நிகழ்ச்சிகளைத் தொகுத்து வழங்கியவர் தொகுப்பாளர் புஜிதா. இவர் தற்போது ’6X4’ என்ற திரைப்படத்தில் நாயகியாக நடித்து வருகிறார்.
அறிமுக இயக்குனர் ஷா என்பவர் இயக்கி வரும் இந்தப் படத்தில் ஆனந்த் என்பவர் நாயகனாகவும் புஜிதா நாயகியாகவும் நடித்து வருகிறார்கள் என்றும் இந்த படத்தின் முதல்கட்ட படப்பிடிப்பு முடிந்துவிட்டது என்றும் தகவல் வெளிவந்துள்ளது. மேலும் இந்த படம் ஒரு திகில் கதையம்சம் கொண்ட திரைப்படம் என்று கூறப்படுகிறது
இந்த திரைப்படத்தில் தான் முக்கிய கேரக்டரில் நடித்து வருவதாகவும் நாட்டில் நடக்கும் அன்றாட பிரச்சனையை மையமாக வைத்து இறுதியில் ஒரு சமூக கருத்தை கூறும் படமாக இருக்கும் என்றும் நாயகி புஜிதா தெரிவித்துள்ளார்.