ஒவ்வொரு ஆண்டும் மாற்றுத்திறனாளிகளுக்கான விழா கொண்டாடப்படுவது வழக்கமான ஒன்றே. அந்த வகையில் இந்த ஆண்டு செப்டம்பர் 9 முதல் 11 வரை இந்த விழா கொண்டாடப்பட்டு வருகின்றது. உலகெங்கும் உள்ள பல நகரங்களில் மாற்றுத்திறனாளிகளுக்கு உதவும் வகையில் பல்வேறு விஷயங்கள் இந்த விழாவில் அறிவிக்கப்படுவதுண்டு.

இந்த நிலையில் சென்னையில் பார்வையில்லாத மாற்றுத்திறனாளிகளுக்காக சென்னை சத்யம் திரையரங்கில் தல அஜித் நடித்த ‘விஸ்வாசம்’ திரைப்படத்தின் சிறப்புகாட்சி ஏற்பாடு செய்யப்பட்டுள்ளது. இந்த காட்சியில் வழக்கமாக திரையில் தோன்றும் வசனங்கள் ஸ்பீக்கர்களில் ஒலிக்கும். ஆனால் பார்வையில்லாத மாற்றுத்திறனாளிகள் காட்சிகளை புரிந்து கொள்வதற்காக ஏற்கனவே ரிகார்ட் செய்யப்பட்ட வர்ணனைகள் அவர்களது ஹெட்போனில் கேட்கும் வகையில் ஏற்பாடு செய்யப்பட்டுள்ளது.

இதனால் பார்வையில்லாத மாற்றுத்திறனாளிகள் வசனத்தை கேட்கும்போதே, ஹெட்செட்டில் ஒலிக்கும் வர்ணனைகளை வைத்து அந்த காட்சிகளை புரிந்து கொள்வர். இந்த காட்சி சென்னை சத்யம் திரையரங்கில் நாளை மாலை 4 மணிக்கு திரையிடப்படுகிறது என்பது குறிப்பிடத்தக்கது.