உலக நாயகன் கமல்ஹாசன் நடித்த 'விஸ்வரூபம் 2' படத்தின் டிரைலர் இன்று மாலை 5 மணிக்கு வெளியாகவுள்ளது. மிகவும் எதிர்பார்க்கப்பட்ட இந்த டிரைலரின் தமிழ் பதிப்பை ஸ்ருதிஹாசனும், இந்தி பதிப்பை அமீர்கானும், தெலுங்கு பதிப்பை ஜூனியர் என்.டி.ஆரும் வெளியிடவுள்ளனர்.

இந்த நிலையில் இந்த படம் வரும் ஆகஸ்ட் மாதம் சுதந்திர தின விடுமுறையை ஒட்டி வெளியாகும் என்று எதிர்பார்க்கப்பட்ட நிலையில் தற்போது இந்த படம் ஆகஸ்ட் 10ஆம் தேதி வெளியாகும் என்று அறிவிக்கப்பட்டுள்ளது. இதனையடுத்து ரிலீஸ் தேதியுடன் கூடிய புதிய போஸ்டரும் சற்றுமுன் சமூக இணையதளங்களில் வெளியாகியுள்ளது. இந்த தகவலை அடுத்து கமல் ரசிகர்கள் மிகுந்த உற்சாகத்துடன் இந்த படத்தை வரவேற்க தயாராகி வருகின்றனர்.

கடந்த 2015ஆம் ஆண்டு தீபாவளி தினத்தன்று வெளியான 'தூங்காவனம்' படத்தை அடுத்து சுமார் இரண்டரை ஆண்டுகள் கழித்து கமல் படம் வெளியாகிறது என்பது குறிப்பிடத்தக்கது. கமல்ஹாசன், ராகுல் போஸ், பூஜாகுமார், ஆண்ட்ரியா, சேகர் கபூர், உள்பட பலர் நடித்துள்ள இந்த படத்திற்கு ஜிப்ரான் இசையமைத்துள்ளார். கமல்ஹாசன் தயாரித்து இயக்கி வரும் இந்த படம் இந்த ஆண்டின் பெரும் எதிர்பார்ப்புக்குரிய படங்களில் ஒன்று என்பது குறிப்பிடத்தக்கது.