'వెళ్లిపోమాకే', 'ఈ నగరానికి ఏమైంది', 'ఫలక్ నుమా దాస్', 'హిట్', 'పాగల్' వంటి సినిమాల ద్వారా ప్రేక్షకులకు దగ్గరైన విశ్వక్ సేన్ ప్రస్తుతం.. 'అశోకవనంలో అర్జున కళ్యాణం' అనే సినిమా చేస్తున్నారు. మార్చి 4న రిలీజ్ కావాల్సిన ఈ సినిమా అనుకోని కారణాల వల్ల వాయిదాపడింది. ఈ విషయాన్ని చిత్ర యూనిట్ ఇటీవల అధికారికంగా ప్రకటించింది.

ప్రముఖ నిర్మాత బీవీఎస్ఎన్‌ ప్రసాద్ సమర్పణలో... ఎస్‌విసిసి డిజిటల్ పతాకంపై ఆయన తనయుడు బాపినీడు, సుధీర్ ఈదర సంయుక్తంగా ఈ సినిమాను నిర్మిస్తున్నారు. ఇందులో విశ్వక్ సేన్ సరసన రుక్సార్ థిల్లాన్ హీరోయిన్‌గా నటిస్తోంది. జై క్రిష్ సంగీతం అందించిన ఈ సినిమాకు 'రాజావారు రాణీగారు' ఫేమ్ రవికిరణ్ కోలా కథ అందిస్తుండగా.. విద్యాసాగర్ చింతా దర్శకత్వం వహిస్తున్నారు.

అయితే ఈలోపు కొత్త ప్రాజెక్ట్‌‌లకు సైతం ఆయన గ్రీన్ సిగ్నల్ ఇస్తున్నారు. తాజాగా విశ్వక్ సేన్ నటిస్తోన్న సినిమా ‘దాస్‌ కా ధమ్కీ’ . నరేశ్ కుప్పిలి దర్శకత్వం వహిస్తున్నారు. బుధవారం పూజా కార్యక్రమాలతో ఈ మూవీ లాంఛనంగా ప్రారంభమైంది. ప్రముఖ నిర్మాత అల్లు అరవింద్‌, దర్శకుడు అనిల్‌ రావిపూడి తదితరులు ముఖ్య అతిథులుగా హాజరయ్యారు. ముహూర్తపు సన్నివేశానికి అరవింద్‌ క్లాప్‌కొట్టగా అనిల్‌ రావిపూడి కెమెరా స్విచ్ఛాన్‌ చేశారు. విశ్వక్‌ సేన్‌ సరసన నివేదా పేతురాజ్‌ మరోసారి నటిస్తున్నారు. పాగల్ సినిమాలో యూత్‌ను ఆకట్టుకున్న ఈ కాంబినేషన్‌పై భారీ అంచనాలున్నాయి. వ‌న్మ‌యి క్రియేష‌న్స్-విశ్వ‌క్ సేన్ సినిమాస్ బ్యాన‌ర్ల పై సంయుక్తంగా క‌రాటే రాజు నిర్మించ‌నున్నారు. ఈ చిత్రానికి ప్ర‌స‌న్న కుమార్ బెజ‌వాడ క‌థ‌, సంభాష‌ణ‌లు అందిస్తున్నారు.