Family Dhamaka:ఫ్యామిలీ ధమాకా.. ఇది దాస్ కా ఇలాఖా : విశ్వక్‌సేన్ హోస్ట్గా ఆహాలో రియాలిటీ షో, స్ట్రీమింగ్ ఎప్పుడంటే..?
- IndiaGlitz, [Tuesday,August 29 2023]
ప్రస్తుతం ఓటీటీ మార్కెట్ బాగా విస్తరిస్తోంది. సీనియర్ హీరో హీరోయిన్లు , నటుడు, ప్రతిభావంతులకు ఈ పరిశ్రమ అవకాశాలు కల్పిస్తోంది. అలాగే ప్రేక్షకులకు మరింత చేరువయ్యేందుకు కూడా దోహదం చేస్తోంది. దీంతో బడా స్టార్లు సైతం తమ స్టార్‌డమ్‌ను పక్కనబెట్టి ఓటీటీల్లో అవకాశాలను అందిపుచ్చుకుని తమ సత్తా చాటుతున్నారు. ఇక అగ్ర నిర్మాత అల్లు అరవింద్ సారథ్యంలో నడుస్తోన్న ‘‘ఆహా ’’ తెలుగువారికి తిరుగులేని వినోదాన్ని అందిస్తోంది. ఇప్పుడు ఈ ఫ్లాట్‌ఫాం నుంచి మరో రియాలిటీ షో ప్రారంభం కానుంది. అదే ‘‘ఫ్యామిలీ ధమాకా’’. సెప్టెంబర్ 8 నుంచి ప్రతీ శుక్రవారం రాత్రి 8 గంటల నుంచి ఈ షో ప్రారంభం కానుంది. కుటుంబాల మధ్య అనుబంధాలను తెలియజేస్తూ.. భావోద్వేగాలు , సవాళ్ల కలయికగా ఈ షోను తీర్చిదిద్దారు నిర్వాహకులు.
అన్నట్లు ఈ రియాలిటీ షోకు యువ హీరో విశ్వక్‌సేన్ హోస్ట్గా వ్యవహరించనున్నారు. ఆయన హోస్ట్ కావడంతో ఈ షోకు విపరీతమైన బజ్ వచ్చేసింది. 15 ఎపిసోడ్ల పాటు ఈ షో సాగనుంది. తాజాగా విడుదల చేసిన ప్రోమోలో విశ్వక్ స్టైల్‌గా ఎంట్రీ ఇచ్చి.. కుటుంబాలను ప్రశ్నలు అడగటం చూడొచ్చు. ‘‘వెల్‌కమ్ టూ మోస్ట్ ఎంటర్‌టైనింగ్ ఫ్యామిలీ షో ఎవర్.. ఫ్యామిలీ ధమాకా.. ఇది దాస్ కా ఇలాఖా’’ అంటూ ఈ షోను పరిచయం చేశారు.
ఈ సందర్భంగా విశ్వక్ సేన్ మాట్లాడుతూ.. ఆహా వారి ఫ్యామిలీ ధమాకా షోకు తాను హోస్ట్గా చేయడం మరిచిపోలేని అనుభూతి అన్నారు. ఈ షో ద్వారా ఎన్నో కుటుంబాలను కలిశానని.. చాలా ఆనందంగా, థ్రిల్లింగ్‌గా వుందని విశ్వక్ వ్యాఖ్యానించారు. ఈ షో ద్వారా ఎన్నో కుటుంబాలను కలిశానని.. ఈ తిరుగులేని ఎంటర్‌టైన్‌మెంట్‌ను ప్రేక్షకులకు అందించడానికి తాను ఎంతో ఆసక్తిగా ఎదురుచూస్తున్నానని విశ్వక్ సేన్ చెప్పాడు. ఇకపోతే ప్రస్తుతం విశ్వక్‌సేన్ గామి, గ్యాంగ్స్ ఆఫ్ గోదావరి, వీఎస్ 10 చిత్రాల్లో నటిస్తూ చాలా బిజీగా వున్నాడు. ఇలాంటి దశల్లో ఓటీటీల్లోనూ తన సత్తా చాటేందుకు విశ్వక్ సిద్ధమవ్వడం విశేషం.