விஷால் ரீமேக் செய்ய விரும்பும் சூப்பர் ஸ்டார் படம்
- IndiaGlitz, [Monday,August 31 2015]
'பாயும் புலி' ரிலீஸ், நடிகர் சங்க தேர்தல் பணிகள், சமூக பணிகள், பாண்டியராஜ் இயக்கும் அடுத்த படத்தின் படப்பிடிப்பு, என நாள்முழுவதும் பிசியாக இருக்கும் நடிகர் விஷால் நேற்று தொலைக்காட்சி ஒன்றின் நேரடி ஒளிபரப்பில் ரசிகர்களின் கேள்விக்கு பதிலளித்தார். இதில் அவர் பல சுவாரசியமான தகவல்களை அளித்துள்ளார்.
ஆர்யா-விஷால் இருவரில் யார் நன்றாக டான்ஸ் ஆடுவார்கள் என கேட்கப்பட்ட ஒரு கேள்விக்கு பதிலளித்த விஷால், 'ஆர்யா எந்த படத்தில் டான்ஸ் ஆடியிருக்கின்றார். அவருக்கு டான்ஸ் ஆடவே தெரியாது. அவரை விட நான் தான் நன்றாக டான்ஸ் ஆடுவேன்' என்று கூறியுள்ளார்.
ஆர்யா, விஷ்ணு, ஜெயம் ரவி, உதயநிதி, விஷால் இவர்களில் சுமாராக நடிக்கும் யார்? என்ற கேள்விக்கு சிறிது நேரம் யோசித்த விஷால், பின்னர் 'என்னைவிட இவங்க எல்லாருமே நன்றாக நடிப்பார்கள். அதனால் இந்த லிஸ்ட்டில் சுமாராக நடிக்கும் நடிகர் விஷால்தான்' என்று கூறினார்.
மேலும் பழைய படம் ஒன்றை ரீமேக் செய்ய விரும்பினால், எந்த படத்தை தேர்வு செய்வீர்கள் என்று கேட்ட கேள்விக்கு பதிலளித்த விஷால் சிறிதும் யோசிக்காமல் 'நெற்றிக்கண்' என்று கூறினார். சூப்பர் ஸ்டார் நடித்த அந்த படம் தன்னை மிகவும் கவர்ந்ததாகவும், ரஜினி அற்புதமாக நடித்த அந்த படத்தை ரீமேக் செய்ய விரும்புவதாகவும் தெரிவித்தார்.
'மத கஜ ராஜா' படத்தை அடுத்து வேறு எந்த படத்திலும் பாடவில்லையே? இனிமேல் பாடுவீர்களா? என்ற கேள்விக்கு 'இசைத்துறைக்கு சேவை செய்ய நான் ரெடி. மியூசிக் டைரக்டர்ஸ் ரெடியா? என்று பதில் கேள்வியை கேட்டார்.
அடுத்ததாக "ஆர்யாவுக்கு பெண் கொடுக்க விரும்பும் பெற்றோர் உங்களிடம் வந்து ஆர்யாவை பற்றி கேட்டால் நீங்கள் என்ன சொல்வீர்கள்? என்ற கேள்விக்கு 'ஆர்யா என்னைவிட நல்லவன், அதனால் நீங்கள் தாராளமாக பெண் கொடுக்கலாம் என்று சொல்வேன்' என கூறினார்.
மேலும் ஒரு எம்.எல்.ஏ பொதுமக்களுக்கு என்னென்ன நன்மைகள் செய்கின்றாரோ அதை நான் இப்போதே செய்து கொண்டுதான் இருக்கின்றேன். அரசியலுக்கு வந்துதான் பொதுமக்களுக்கு சேவை செய்ய வேண்டும் என்பது இல்லை. நடிகனாக இருந்தும் சேவையை தொடரலாம். என்னுடைய ரசிகர்களும் தங்களால் முடிந்த அளவுக்கு பிறருக்கு சேவை செய்யுங்கள்" என்று கூறி இந்த உரையாடலை விஷால் முடித்தார்.