விஷால் நடிப்பில் மிஷ்கின் இயக்கிய த்ரில் திரைப்படம் 'துப்பறிவாளன்' வரும் 15ஆம் தேதி தமிழகம் முழுவதும் பிரமாண்டமாக ரிலீஸ் ஆக அனைத்து ஏற்பாடுகளும் தயார் நிலையில் உள்ளது. இந்த படத்தின் சென்னை மற்றும் செங்கல்பட்டு ரிலீஸ் உரிமையை ஏஜிஎஸ் நிறுவனம் பெற்றுள்ளதால் இந்த இரண்டு பகுதிகளிலும் சுமார் 87 திரையரங்குகளுக்கும் அதிகமாக வெளியிட திட்டமிடப்பட்டுள்ளது. தமிழகத்தில் மொத்தம் இந்த படம் 350 திரையரங்குகளில் வெளிவரும் என்று எதிர்பார்க்கப்படுகிறது.

மிஷ்கின் - விஷால் முதல்முறையாக இணைந்துள்ள இந்த படத்தில் பிரசன்னா, ஆண்ட்ரியா, அனு இமானுவேல், வினய்ராய் மற்றும் கே.பாக்யராஜ் உள்ளிட்ட பலர் நடித்துள்ளனர்.

இந்த நிலையில் இதே மாதத்தில் அதாவது இம்மாதம் 28ஆம் தேதி விஷால் நடித்த முதல் மலையாள திரைப்படமான 'வில்லன்' திரைப்படமும் வெளியாகவுள்ளது தற்போது உறுதி செய்யப்பட்டுள்ளது. மோகன்லால், மஞ்சுவாரியர் முக்கிய வேடங்களில் நடித்துள்ள இந்த படத்தில் விஷால் வில்லனாக நடித்துள்ளார். ஒரே மாதத்தில் இரண்டு விஷால் படங்கள் வெளியாவதால் அவருடைய ரசிகர்கள் உற்சாகமடைந்துள்ளனர்.