ரஜினி கட்சி, கமல் கட்சி யாருக்கு ஆதரவு? விஷால் பதில்
- IndiaGlitz, [Wednesday,July 19 2017]
சூப்பர் ஸ்டார் ரஜினிகாந்த் கடந்த சில வாரங்களுக்கு முன் ரசிகர்களை சென்னையில் சந்தித்தபோது அரசியலுக்கு வருவது குறித்து மறைமுகமாக பேசினார். அவருடைய அரசியல் அறிவிப்பு 'காலா' படத்தின் படப்பிடிப்பு முடிந்த பின்னர் இருக்கலாம் என்று எதிர்பார்க்கப்படுகிறது.
இந்த நிலையில் உலக நாயகன் கமல்ஹாசனும் நேற்று தனது டுவிட்டரில் பதிவு செய்த கவிதையால் அவரிடம் இருந்து எந்த நேரத்திலும் அரசியல் குறித்த அறிவிப்பு வரலாம் என்று கூறப்படுகிறது.
இந்த நிலையில் சற்று முன் செய்தியாளர்களை சந்தித்த நடிகர் சங்க செயலாளரும், தயாரிப்பாளர் சங்க தலைவருமான விஷால், ரஜினி, கமல் இருவருமே கட்சி ஆரம்பித்தால் யாருக்கு ஆதரவு என்ற கேள்விக்கு பதிலளித்தபோது, 'ரஜினி, கமல் இருவருமே அதிகாரபூர்வமாக அரசியலில் ஈடுபடுவதாக அறிவித்த பின்னரே யாருக்கு ஆதரவு என்பதை கூற முடியும். அதற்கு முன் யாருக்கு ஆதரவு என்று கூறுவது சரியாக இருக்காது' என்று கூறினார்.
மேலும் தற்போது நடைபெற்று வரும் பிரச்சனையில் கமல்ஹாசனுக்கு எப்போதும் நாங்கள் ஆதரவு அளிப்போம் என்றும் அவர் பின்னால் திரையுலகினர் திரண்டு நிற்பது உறுதி' என்றும் கூறினார்.