தமிழ் திரைப்படவுலகம் கடந்த ஒரு மாதமாக பல்வேறு கோரிக்கைகளை வலியுறுத்தி வேலைநிறுத்தம் செய்து வருகிறது. புதிய திரைப்படங்கள் ரிலீஸ் இல்லை என்பது முதல் படப்பிடிப்பு, போஸ்ட் புரடொக்சன்ஸ் உள்ளிட்ட எந்த பணியும் நடைபெறாமல் நடைபெற்று வரும் ஒட்டுமொத்த வேலைநிறுத்தத்தால் திரையுலகமே ஸ்தம்பித்துள்ளது.

இந்த நிலையில் தமிழ் திரைப்பட தயாரிப்பாளர்கள் சங்கத்தின் நீண்ட நாள் கோரிக்கையான 'திரைப்படத்துறைக்கு என தனி வாரியம்' வேண்டும் என்ற கோரிக்கையை பரிசீலித்து தேவைப்பட்டால் வாரியம் அமைக்கப்படும் என செய்தி மற்றும் விளம்பர துறை அமைச்சர் கடம்பூர் ராஜூ அவர்கள் அறிவித்துள்ளார்.

அமைச்சர் கடம்பூர் ராஜூ அவர்களின் இந்த அறிவிப்புக்கு தயாரிப்பாளர் சங்கத்தலைவர் விஷால் நன்றி தெரிவித்துள்ளார். அவர் இதுகுறித்து கூறியபோது, 'தயாரிப்பாளர்கள் சங்கத்தின் முக்கிய கோரிக்கைகளில் ஒன்றான திரைத்துறைக்கு தனி வாரியம் அமைக்கப்படும் என்று உறுதியளித்த அமைச்சர் திரு கடம்பூர் ராஜு அவர்களுக்கு நன்றியினை தெரிவித்துக்கொள்கிறேன், திரைத்துறை சம்மந்தபட்ட அனைத்து கோரிக்கைகளையும் தமிழக அரசு விரைவில் நிறைவேற்றும் என நம்புகின்றோம்' என்று விஷால் கூறியுள்ளார்.