இன்னிக்கு நான் நிம்மதியாக தூங்குவேன்.. 'மார்க் ஆண்டனி' வெற்றி குறித்து விஷால்..!
- IndiaGlitz, [Saturday,September 16 2023]
விஷால் நடித்த ‘மார்க் ஆண்டனி’ திரைப்படம் நேற்று உலகம் முழுவதும் திரையரங்குகளில் வெளியாகி நல்ல வரவேற்பை பெற்று வருகிறது என்பதும் பாசிட்டிவ் விமர்சனம் காரணமாக இந்த படம் முதல் நாளே நல்ல வசூலை பெற்றுள்ளதாகவும் தகவல்கள் வெளியாகி உள்ளன.
மேலும் ‘மார்க் ஆண்டனி’ திரைப்படம் சோலோவாக போட்டியின்றி ரிலீஸ் ஆனதால் முதல் நாள் வசூல் திருப்திகரமாக இருப்பதாக விநியோகஸ்தர்கள் மற்றும் திரையரங்கு உரிமையாளர்கள் தெரிவித்துள்ளனர். அதுமட்டுமின்றி விநாயகர் சதுர்த்தி விடுமுறை உட்பட இன்று முதல் மூன்று நாட்கள் தொடர் விடுமுறை என்பதால் இந்த படத்தின் அடுத்தடுத்த நாட்களில் வசூல் குவியும் என்று எதிர்பார்க்கப்படுகிறது.
இந்த நிலையில் ‘மார்க் ஆண்டனி’ படத்திற்கு கிடைத்த வரவேற்பை அடுத்து நடிகர் விஷால் தனது சமூக வலைத்தளத்தில் வீடியோ ஒன்றை வெளியிட்டுள்ளார். அதில் ‘மார்க் ஆண்டனி’ திரைப்படத்திற்கு நாங்கள் என்னதான் உழைத்தாலும், ரசிகர்களாகிய தெய்வங்கள் மற்றும் மேலே இருக்கிற தெய்வங்கள் காரணமாக வெற்றி கிடைத்துள்ளது.
நல்ல படம் என்ற வார்த்தையை கேட்கும் போது மகிழ்ச்சியாக உள்ளது. இந்த படத்தை பார்த்து ஆதரவு கொடுத்த அனைவருக்கும் எங்களது நன்றி. குறிப்பாக இந்த படத்திற்கு எங்களுக்கு உதவி செய்த கார்த்தி, வெங்கட் பிரபு, சிம்பு, கார்த்திக் சுப்புராஜ் ஆகியோர்களுக்கு எங்கள் நன்றி.
ஒன்றரை வருட உழைப்பிற்கு தற்போது பலன் கிடைத்துள்ளதால் இன்று இரவு நான் நிம்மதியாக தூங்குவேன். அதேபோல் நான் ஏற்கனவே கூறியபடி ‘மார்க் ஆண்டனி’ படத்தின் ஒவ்வொரு டிக்கெட்டுக்கும் ஒரு ரூபாய் உங்கள் சார்பாக விவசாயிகளுக்கு தருவேன் என்றும் அவர் கூறியுள்ளார்.
Thank You Very Much Everyone, God Bless pic.twitter.com/LnXb76qcSI
— Vishal (@VishalKOfficial) September 16, 2023