'மார்க் ஆண்டனி' படத்தில் இன்னொரு அவதாரம் எடுத்த விஷால்.. மாஸ் வீடியோ..!
- IndiaGlitz, [Thursday,July 13 2023]
விஷால் நடிப்பில் ஆதிக் ரவிச்சந்திரன் இயக்கத்தில் உருவாகி வரும் ’மார்க் ஆண்டனி’ படத்தின் படப்பிடிப்பு சமீபத்தில் முடிவடைந்து தற்போது தொழில்நுட்ப பணிகள் விறுவிறுப்பாக நடைபெற்று வருகின்றன. சமீபத்தில் விஷால் தனது பகுதியின் டப்பிங் பணியை முடித்தார் என்பதும் இதையடுத்து மற்ற நட்சத்திரங்களின் டப்பிங் பணிகள் நடைபெற்று வருகிறது என்பதும் குறிப்பிடத்தக்கது.
இந்த நிலையில் நேற்று இந்த படத்தில் டி ராஜேந்தர் ஒரு பாடலை பாடினார் என்ற வீடியோ வெளியாகி இணையத்தில் வைரலான நிலையில் தற்போது விஷாலும் பாடகராக மாறி இருப்பது பரபரப்பை ஏற்படுத்தி உள்ளது. இது குறித்த வீடியோவை படக்குழுவினர் வெளியிட்டுள்ளனர். அதில் விஷால் இந்த படத்தில் இடம்பெற்ற ஒரு பாடலை பாடும் காட்சி உள்ளது. இதனை அடுத்து நடிகர் தயாரிப்பாளர் என்ற அவதாரங்களில் இருந்த விஷால் தற்போது பாடகர் ஆகவும் அவதாரம் எடுத்து உள்ளார் என்பது குறிப்பிடத்தக்கது.
ஏற்கனவே நடிகர் விஷால் ’மதகஜ ராஜா’ என்ற திரைப்படத்தில் விஜய் ஆண்டனி கம்போஸ் செய்த ஒரு பாடலை பாடியிருந்தார். ஆனால் அந்த படம் எதிர்பாராத காரணத்தால் வெளியாகவில்லை என்பது குறிப்பிடத்தக்கது
டைம் டிராவல் கதையம்சம் கொண்ட இந்த படத்தில் விஷால், எஸ்ஜே சூர்யா, சுனில், செல்வராகவன், ரிதுவர்மா, அபிநயா, ஒய்ஜி மகேந்திரன் உள்ளிட்ட பலர் நடித்துள்ளனர். வினோத்குமார் தயாரித்துள்ள இந்த படத்திற்கு ஜிவி பிரகாஷ் இசை அமைத்துள்ளார்.