நடிகர் சங்க செயலாளரும், தயாரிப்பாளர் சங்கத்தின் தலைவருமான விஷால் அவர்களின் சகோதரி ஐஸ்வரியாவின் திருமணம் ஆகஸ்ட் 27ஆம் தேதி நடைபெறவுள்ளது. இந்த திருமணத்திற்கு அழைப்பிதழ் கொடுக்கும் பணியில் விஷால் பிசியாக உள்ளார்.

எம்.பி.ஏ படித்துள்ள விஷாலின் தங்கை ஐஸ்வர்யா, விஷாலின் 'விஷால் பிலிம் பேக்டரி நிறுவனத்தை நிர்வகித்து வருகிறார். சென்னையை சேர்ந்த பிரபல நகைக்கடை அதிபரின் மகன் உம்மிடி கிருத்திஷ் தான் ஐஸ்வர்யாவை கரம் பிடிக்க போகும் மாப்பிள்ளை. இந்த திருமணம் பெற்றோர்களால் நிச்சயிக்கப்பட்டது என்பது குறிப்பிடத்தக்கது.

சென்னை எம்.ஆர்.சி. நகரில் இருக்கும் மேயர் ராமநாதன் ஹாலில் உம்மிடி கிருத்தீஷ்-ஐஸ்வர்யா திருமணம் நடைபெறவுள்ளது. இந்த திருமணத்திற்கு நகைக்கடை அதிபர்கள் மற்றும் திரையுலக பிரமுகர்கள் வருகை தருவார்கள் என்று எதிர்பார்க்கப்படுகிறது.

விஷாலின் அண்ணன் விக்ரம் கிருஷ்ணாவுக்கும் நடிகை ஸ்ரேயா ரெட்டிக்கும் கடந்த 2008-ம் ஆண்டு திருமணம் நடந்தது. எனவே விஷால் வீட்டில் இன்னும் திருமணம் ஆகாத ஒரே நபர் விஷால் மட்டுமே என்பதும் அதுவும் நடிகர் சங்க கட்டிடம் கட்டி முடித்தவுடன் அந்த கட்டிடத்தின் முதல் மங்கள நிகழ்ச்சியாக நிகழும் என்றும் எதிர்பார்க்கப்படுகிறது.