வெள்ள நிவாரண நிதியாக அஜித்-விஜய் கொடுத்தது எவ்வளவு? விஷால் விளக்கம்
- IndiaGlitz, [Monday,December 28 2015]
சமீபத்தில் சென்னை உள்பட தமிழகத்தின் பல நகரங்களில் கனமழை பெய்து அதனால் ஏற்பட்ட பெருவெள்ளத்தால் லட்சக்கணக்கானோர் பாதிக்கப்பட்டு தங்கள் சொத்துக்களையும் உறவினர்களையும் இழந்த நிலையில் அவர்களுக்கு கைகொடுத்து உதவ பல தன்னார்வ அமைப்புகள் உதவி செய்தனர். இதில் கோலிவுட் திரையுலகினர்களின் பங்கும் பெருமளவில் இருந்தது. பல லட்சங்கள் முதல் சில ஆயிரம் வரை பெரிய, சிறிய நடிகர்கள் என பாகுபாடில்லாமல் நிதியுதவியும், பொருளுதவியும் செய்தனர்.
இந்நிலையில் தமிழகத்தின் இருபெரும் நடிகர்களான அஜித் மற்றும் விஜய் வெள்ள நிவாரண நிதியாக எவ்வளவு கொடுத்தார்கள் என்பது குறித்து மாறுபட்ட செய்திகள் இணையதளத்தில் வெளியாகியது. இதுகுறித்து சமீபத்தில் பத்திரிகையாளர் சந்திப்பில் கூறிய நடிகர் சங்க செயலாளர் விஷால், 'அஜித் மற்றும் விஜய் இருவருமே நடிகர் சங்கத்தின் மூலம் எந்தவித பணமும் தரவில்லை. ஆனால் தனிப்பட்ட முறையில் பல நடிகர்கள் வெள்ள நிவாரண உதவி செய்தனர்' என்று கூறினார்.
மேலும் நடிகர் சங்கத்திடம் வெள்ள நிவாரண நிதியாக அஜித் ரூ.60 லட்சம் கொடுத்ததாகவும் விஜய் ரூ.3 கோடி கொடுத்ததாகவும் வெளிவந்த தகவல்கள் முற்றிலும் வதந்தியே என்றும் அவர் கூறினார்.