ஒருபுறம் தென்னிந்திய நடிகர் சங்க தேர்தல் பணியில் நடிகர் விஷால் பிசியாக இருந்தாலும் மற்றொரு பக்கம் படப்பிடிப்பிலும் தவறாது கலந்து கொண்டு வருகிறார். சமீபத்தில் ரிலீஸான 'பாயும் புலி' திரைப்படம் கலவையான விமர்சனத்தை பெற்று எதிர்பார்த்த வசூலை பெறாத நிலையில், அவர் தற்போது பாண்டியராஜின் இயக்கத்தில் நடித்து கொண்டிருக்கும் படத்தில் தனது முழு கவனத்தையும் செலுத்தி வருகிறார்.

இந்நிலையில் விஷால்-பாண்டியராஜ் இணையும் படத்தின் படப்பிடிப்பு சென்னை மற்றும் அதன் சுற்றுப்புறங்களில் விறுவிறுப்பாக நடந்து வரும் நிலையில் இந்த படத்தின் டைட்டிலை தற்போது இயக்குனர் இறுதி செய்தி அதை அதிகாரபூர்வமாக நேற்று அறிவித்துள்ளார். இந்த படத்திற்கு அவர் தேர்வு செய்த டைட்டில் 'கதகளி'. ஆக்சன் த்ரில்லர் படமாக உருவாகி வரும் இந்த படத்திற்கு 'கதகளி' டைட்டில் மிகப்பொருத்தமானது என்று கூறி பலர் பாண்டியராஜுக்கு சமூக வலைத்தளங்களில் வாழ்த்து தெரிவித்து வருகின்றனர்.

விஷால் பிலிம் பேக்டரி மற்றும் பசங்க புரடொக்ஷன்ஸ் நிறுவனங்கள் இணைந்து தயாரிக்கும் இந்த படத்திற்கு ஹிப் ஹாப் தமிழா ஆதி இசையமைக்கின்றார். இந்த படத்தில் விஷாலுக்கு ஜோடியாக 'மெட்ராஸ்' நாயகி கேதரின் தெரசா நடித்து வருகிறார்.