తమిళ్, తెలుగు సినిమాల్లో హీరోగా మంచి సినిమాలు చేసి పేరు తెచ్చుకున్న విశాల్ ఇప్పుడు పెళ్ళి చేసుకోబోతున్నాడు. సాధారణంగా ఇల్లు కట్టి చూడు, పెళ్లి చేసి చూడు అంటూ వుంటారు. కానీ, విషయంలో అది రివర్స్ అయిందని చెప్పాలి. ఎందుకంటే తమిళ నటీనటుల సంఘానికి సొంత భవనం నిర్మించిన తర్వాతే పెళ్ళి చేసుకుంటానని గతంలో చాలా సార్లు చెప్పారు.

ప్రస్తుతం అది నిర్మాణంలో ఉంది. దాంతో పాటు నిర్మాతల సంఘం అధ్యక్షుడిగా నిర్మాతల మండలి కోసం ఓ భవంతి కట్టిస్తున్నారు విశాల్. ఇక పెళ్లి చేసుకోవడమే ఆలస్యం. పెళ్లి కూడా ఖరారైంది. 'త్వరలోనే హైదరాబాద్‌కు చెందిన బిజినెస్‌మేన్ కూతురు అనీషాతో విశాల్ వివాహం చేయబోతున్నాం' అని విశాల్ తండ్రి, నిర్మాత జి.కె.రెడ్డి ప్రకటించారు.

దాంతో అది పెద్దలు కుదిర్చిన వివాహం అనుకున్నారంతా. కానీ ప్రేమ వివాహమే అని విశాల్ కన్‌ఫర్మ్ చేశారు. హైదరాబాద్ బిజినెస్‌మేన్ విజయ్‌రెడ్డి, పద్మజ కుమార్తె అనీషను విశాల్ పెళ్లాడనున్నారు. ‘‘మాది లవ్ మ్యారేజ్. వచ్చే వారంలో మా రెండు కుటుంబాలు కలుసుకొని ఎంగేజ్‌మెంట్ డేట్‌ని ఫిక్స్ చేస్తారు. నిర్మాతల సంఘం నూతన భవన నిర్మాణం పూర్తయ్యాక, అందులోనే పెళ్లి చేసుకుంటాను’’ అని విశాల్ పేర్కొన్నారు.