கடந்த பொங்கல் தினத்தில் வெளியான 'கதகளி' திரைப்படம் நல்ல வரவேற்பை பெற்ற நிலையில் விஷால் நடித்து வரும் அடுத்த படமான 'மருது' படத்தின் படப்பிடிப்பு விறுவிறுப்பாக நடைபெற்று வந்தது. இராஜபாளையம் மற்றும் அதன் சுற்றுப்புறங்களில் நடைபெற்று வந்த இந்த படத்தின் படப்பிடிப்பு தற்போது இறுதி நிலைக்கு வந்துள்ளது.

விஷாலுக்கு ஜோடியாக முதல்முறையாக ஸ்ரீதிவ்யா நடித்துவரும் இந்த படத்தின் கிளைமாக்ஸ் காட்சிகள் கடந்த சில தினங்களாக விறுவிறுப்புடன் நடைபெற்று வந்ததாகவும், தற்போது கிளைமாக்ஸ் படப்பிடிப்பு முடிவு பெற்றதாகவும் செய்திகள் வெளிவந்துள்ளது. இந்த செய்தியை விஷால் தன்னுடைய சமூக வலைத்தளத்தில் உறுதிப்படுத்தியுள்ளார்.

மேலும் கிளைமாக்ஸ் படப்பிடிப்பின்போது தனக்கு சிறு காயம் ஏற்பட்டதாகவும் இருப்பினும் எந்தவித பிரச்சனையும் இல்லாமல் படப்பிடிப்பு இனிதாக முடிவடைந்ததால் தனக்கு மகிழ்ச்சியே என்றும் விஷால் தெரிவித்துள்ளார்.

விஷால், ஸ்ரீதிவ்யா, சூரி, ராதாரவி, மற்றும் 'தாரை தப்பட்டை' புகழ் ஆர்.கே.சுரேஷ் உள்பட பலர் நடித்துள்ள இந்த படத்திற்கு டி.இமான் இசையமைத்துள்ளார். அன்புச்செழியனின் கோபுரம் பிலிம்ஸ் நிறுவனம் தயாரித்துள்ள இந்த படத்திற்கு வேல்ராஜ் ஒளிப்பதிவும், ப்ரவீண் படத்தொகுப்பும் செய்துள்ளனர்.