விஜய் ரசிகருக்கு ஐடியா கொடுத்த விஷால்
- IndiaGlitz, [Saturday,May 14 2016]
இளையதளபதி விஜய் நடித்த 'தெறி' திரைப்படம் நேற்று ஒரு தனியார் பேருந்தில் ஒளிபரப்பப்பட்டது என்பதும் அதை விஜய் ரசிகர் ஒருவர் கொடுத்த தகவலின்படி நடவடிக்கை எடுக்கப்பட்டதும் தெரிந்ததே.
தற்போது வந்துள்ள புதிய தகவலின்படி அந்த பேருந்தில் பயணம் செய்த விஜய் ரசிகர் முதலில் விஷாலுக்கு இந்த தகவல் சொன்னதாகவும், விஷாலின் ஆலோசனையின்படி 'தெறி' படம் திரையானதை அந்த ரசிகர் தனது மொபைல் போனில் வீடியோ எடுத்து உறுதியான ஆதாரத்தை தயார் செய்ததாகவும் கூறப்படுகிறது.
இந்த ஆதாரத்தின் அடிப்படையில்தான் திருட்டு விசிடி தடுப்பு சிறப்பு ஆய்வாளர் ஜெயலட்சுமியிடம் புகார் கொடுக்கப்பட்டதாகவும், அந்தப் புகாரின் பேரில், ஆய்வாளர் நந்தகுமார் மற்றும் மகேந்திரன் ஆகியோர் அந்த பேருந்தின் ஓட்டுநரைக் கைது செய்ததாகவும் செய்திகள் வெளிவந்துள்ளது.
விஷாலின் இதுபோன்ற அதிரடி நடவடிக்கைகள் தொடர்ந்தால் திருட்டு டிவிடியை கட்டுப்படுத்திவிடலாம் என்றே எதிர்பார்க்கப்படுகிறது.